Ba shah rem ha ka Mizoram kut noh ka lynti ïaid jong ka Meghalaya ha ka BC Roy Trophy 2026-27

Shillong, Nailur 06 : Ka Meghalaya kam shym la lah ban jam sha ka quarterfinal jong ka Junior Boys National Football Championship 2026-27 (Tier 1) na ka bynta ka Dr. BC Roy Trophy hadien ba ka la shah rem ha ka jingïalehkai Group C kaba khatduh pyrshah ïa ka Mizoram da 3-0 ha Bengaluru ha kane ka sngi Saitjain.
Ki kynhun baroh ar tylli ki la ïoh ïa kajuh ka jingbun point kata mar 6 point ha shuwa ka jingïalehkai ha kne ka sngi. Hynrei ka Mizoram ka la ïoh ïa u nam tam da ka jingïapher ha ka jingïoh thep bun kol (+9 pyrshah ïa +4). Kumta ka Meghalaya ka hap ban jop namar tang ka kynhun kaba wan nyngkong ha ka group kan jam sha ka knockout.
Ka Meghalaya ka la jop ïa ka Tamil Nadu da 2-1 kol bad ïa ka Maharashtra da 3-0 kol, katba ka Mizoram ka la jop da 7-0 bad 2-0 ïa kine ki kynhun ar ha ka jingiakhun ba la dep.
Na ka liang u Coach ka kynhun u Playerson Jitem Syiemlieh u la bteng ban shaniah ha ka juh ka kynhun ïakhun na ki jingïalehkai ar kiba la dep da ka jingkyrmen ba ka Meghalaya kan ïoh ïa ka jingjop. Wat la ka Meghalaya ka la pyrshang ban ïakhun borbah hynrei ka la mad pynban ïa ka jingshha thep kol tang hapoh shiteng kynta jong ka jingïakhun. Ka bol ba khyrwit da u C Lalhmingropuia (25′) na jngai ka la leit tyngkhuh na madan bad ka la lait na ki kti jong u rangap kol ka Meghalaya, u Alvin Kharbani.
Ka Meghalaya kam shym la shah duh mynsiem satia hynrei ka la ïakhun tyngeh da ka thong ban ïoh pynïakhaid noh. Kumta kham hadien u coach u la wanrah ka jingkylla da kaba sei madan ïa u Mangpaka Nongkynrih bad u Skhemlang Marthong ban mih bujli ïa u Aiborlang Mulieh bad u Pyrkhatlang Marbaniang.
Hapdeng ka jingïakhun, ka Mizoram ka la ïoh biang sa shi kol lyngba u Lalhmingropuia ha ka minit kaba 56 hadien ba ka bol kaba u khyrwit ka la leit beit sha kol da kaba iaid najrong jong u rangap kol.
Watla katta, ka Meghalaya ka don ka jingkyrmen ba kan lah ban ïalehkai bha ha ki por ban dang wan na ka jingnang kiew ha ka rukom ialehkai.
Khatduh eh, u Malsawmtluanga (90’+1) u la pynkut ïa ka jingïalehkai da kaba thep ia ka kol kaba lai da kaba khyrwit na shabar jong ka phyllaw kol.
Ka kynhun jong ka Meghalaya ha kane ka sngi ki kynthup ïa u : Alvin Kharbani (GK), Shanborlang Khongjee, Franky Kharkrang, Samuel Malieh, Wallambok Thongni, Pyrkhatlang Marbaniang (sub Skhemlang Marthong HT), Andrew Kharsati (sub Sannaky Nongsiej 69′), Aibannangkhraw Kharumnuid (sub Mallenga N Sangma 87′), Adriel B Nongbet (sub Kishan Wahlang 69′), Aiborlang Mulieh (sub Mangpaka Nongkynrih HT), Habankhlur Lyngdoh Mawnai.