Ba pyntrei torti palat ïa ki surok byrngem ka JAC ban ujor PIL ïa ka Dhar Construction Company

By Mawphor News Desk On Nov 5, 2023

Shillong, Naiwieng 04: Namar ka jingbitar palat ïa ka jingsniew ki surok khamtam ki surokbah (National Highway) hapoh ka thaiñ West Jaintia Hills, ka Joint Action Committee (JAC) War Jaintia mynta ka sngi Saitjain, ka la byrngem ban ujor noh sha ka ïing bishar pyrshah ïaka Dhar Construction Company (DCC).
Haba kren sha ki lad pathai khubor u Chairman ka JAC Bah Yoodahunki Shylla ula ïathuh ba kane ka jingthmu ban leit ujor sha ka ïing bishar pyrshah ïa ka DCC ka dei halor ka nongrim ba kane ka kompani kaba pyntrei ïa ka National Highway (NH-206) haka jinglut kaba kot haduh T.43 klur tam ka la shu pyntrei torti palat ïa ka kam.
Ka surok NH-206 ka dei kaba sdang na Jowai marjan ka surok NH-106 bad ka ïaid lyngba sha Dawki bad kut pat ha Mylliem. Ka dei ruh shibynta jong ka surok Shillong-Sylhet.
U Bah Yoodahunki ula ïathuh ba kane ka surok bah (NH206) ka dei kaba sdang naduh ka shnong Nongtalang sha Dawki, ka ba don 16 Km ka jingjrong bad la mang pisa T.43 klur tam. ïa kane ka surok la sdang ban pyntrei naduh ka 9 tarik Nailur 2022 hynrei tang hapoh ka 12 bnai kane ka surok ka la jot rathai.
Ula kynnoh ba tang hapoh 12 bnai ba la pyndep ïa ka surok da ka Dhar Construction Company, kane ka surok ka la jot rathai bad kynnoh ba kane ka paw shai ba ka Dhar Company kala shu pyntrei torti ïa ka surok tang ban ïoh jingmyntoi shimet.
“Ka JAC ka la leit ban jurip ïa kane ka surok bad ka la lap ïa ka jingpyntrei torti jong ka kompani. Tang 2 bnai hadien ba la dep shna, kane ka surok ka la sniew biang” la ong u bah Yoodahunki.
U Bah Yoodahunki ula ïathuh ba na ka liang ka JAC ka la pan ruh ïa ka RTI halor kane ka surok ban lap ïa ka jingtip ba bniah bad la shem ba na ka liang ki Engineer ki la dep ban pynlait pisa haduh T.12 klur tam sha ki Contractor khlem da leh ïa ka jingbishar bniah halor ka rukom shna ïa kane ka surok.
Ula ong “Na ka liang ka JAC ka la shong da ka jingïalang bad ki nongïalam shnong ka thaiñ bad kala shim ïa kawei ka rai ba kin leit ujor noh sha ka ïing bishar pyrshah ïa kane ka Dhar Company kaba la pyntrei torti ïa kane ka surok”.
Nalor kane ka JAC kala dawa ruh ba u Chief Engineer udei ban pynshai halor ka jingleh matlah jong ka tnad ïa ki jingpyntrei torti ka Dhar Company ïa kane ka surok namar tang 2 bnai hadien ba la dep shna kane ka surok ka la jot rathai biang.