Ba leh donbor bad pyntuid khyndew u Marwari sha surok ha Umjojwa, sha u DC Ri Bhoi ujor ka HITO

Nongpoh, Naitung 22: Ka seng HITO, Byrnihat Circle kala buh syndon da ka jingmaham kaba tyngeh bad leit pynsangeh ïaka jingtih khyndew jong ka karkhana jong uwei u Marwari bala tip kyrteng kum u Utam Zunzunwala haka shnong Umjojwa, Narbong kaba la pynthud shi katdei ïaka leit ka wan jong ki paidbah ha katei ka shnong.
Halor katei ka jingleh khlem akor jong utei u Marwari wat hadien ka jingud jingnam jong ki paidbah naka liang ka seng kala leit buh syndon da ka signboard ba ym bit ban tih khyndew ha katei ka jaka bad ruh ban buh ka jingujor sha u Deputy Commis sioner ka Ri-bhoi district ban shimkhia ïaka jingeh jong ki paidbah naka jingleh khlem akor utei u Marwari.
Na ka liang u Samla Kapil Kurbah President ka seng HITO Byrnihat Circle u la pynpaw ba kum ka seng ka dap da ka jingsngewkhia kaba jur halor ka jingleh donbor jong utei u Marwari wat hadien ka jingujor bad ka jingud jong ki paidbah, kaba ki paidbah ki shem jingeh wat ban leit ban wan namar ka jingktieh shaba palat bad kyrpad ruh sha ki bor district ba kim shimkhia mardor pyrshah ïaka jingpynthud utei u Marwari ïaka leit ka wan ki paidbah nongshong shnong.