Shillong, Naitung 10 : Ka Myntri ka tnad ka Rep ka Riang, Kong Ampareen Lyngdoh ka la pyntip ba shen kan sa phah da ka jingthoh sha u Myntri Rangbah ka jylla ban lum ka jingialang khnang ba kin lah ban iakren halor ka jingeh ba ki nongrep ki kynduh namar ka jingdon ki khyrdop lum khajna.
Kane ka jingpyntip ka Myntri ka dei hadien ka jingialang bad ki nongrep na kylleng ka rilum Khasi-Jaintia kiba la pyntip halor ka jingeh ba ki iakynduh namar ki shah khrong khajna ha ki khyrdop lum khajna kiba don hapoh ka rilum Khasi-Jaintia.
“Ki khyrdop lum khajna ki long kum ki mawjynthut ïa ki nongrep bad kane ka ktah ïa ka ïoh ka kot jong ki nongrep kiba trei shitom ban pynmih ïa ki mar rep na ka bynta ka jingdonkam ki paidbah ka jylla baroh kawei,” ka la ong haba kren bad ki lad pathai khubor hadien ka jingïalang.
Shuh shuh ka la ong ruh ba kum ka Myntri kan shimkhia ïa kane ka jingud ki nongrep bad kan pynsngew ïa kane ka juh ka mat sha u Myntri Rangbah ka jylla ban shim rai halor kane na ka bynta ban ai mynsiem bad ban pynshlur ïa ki nongrep ka jylla ban nang trei shitom ban lah ban pynmih khambun shuh shuh ki mar rep naka bynta ka jingdonkam ka jylla.
“Ngam ong la kine ki khyrdop lum kidei kiba ithuh lane kiba be-ain, la ki long ka jingmyntoi ne duh nong hynrei katkum ka jingpynsngew ki nongrep, kine ki khyrdop ki long ka jingduh nong ïa ki nongrep bad ngi dei ban pynduh ïa kum kine” ka la ong.
