Ba bun ki jingujor bad tlot ka jingshakri, leit jurip bad kynduh ka RBYF ïa ka MS ka Nongpoh Civil Hospital

0

Nongpoh Risaw 04: Namar ka jingtlot ka rukom ai jingshakri ka Nongpoh Civil Hospital bad ka jingujor kaba mih na ka por shaka por na ki paidbah kiba leit shah sumar ha katei ka Hospital, ka seng Ri-Bhoi Youth Federation sengkmie hapoh ka jingïalam u Bah Bipul Thangkhiew President ba rangbah lem bad ki dkhot mynta ka sngi ki la leit ban jurip ïa katei ka jaka ai jingsumar bad ïakynduh syndon ïa ka Medical Superintendent jong ka Nongpoh Civil Hospital ka Dr D Blah ban ïakren halor shibun ki mat bad ka jingujor ba kum ka seng ka la ioh na ki paidbah, halor ka jingtlot ka jingshakri katei ka jaka ai jingsumar bad ka jingleh meng ki nongtrei katei ka hospital.
Ka seng ka la pynsngew ruh halor ki jingjia kiba la dep jia na ka por shaka por kumba dang shen ka la don kawei ka longkmie kaba hap khun ha painkhana, bad shibun ki jingjia haki por ba la leit bad kum ka seng kam kwah ba kum kitei ki jingjia kin dang jia nangne shakhmat bad lada jia biang ka seng kan sa shim pat da kiwei ki sienjam kiba tyngeh.
Haba kren sha ki lad pathai khubor na ka liang u Bah Bipul Thangkhiew u la ong ba ka daw hi ba la pynlong ïa ki nongïalam ka seng ban leit kynduh mynta ka sngi ïa ki bor pynïaid katei ka jaka ai jingsumar ka dei namar shibun ki jingujor na ki paidbah bad kum ka seng ka la ju phah ïa ki nongïalam Circle na ka por shaka por hynrei ki juh hi ki jingjia ki dang jia kumba dang shen ka la don ruh ka jinghap khyllung kaba kynnoh na ka jingtorti ki nongtrei katei ka hospital.
Ha katei ka jingleit kynduh bad ka Dr Blah ka la jingïakren ka la long kaba seisoh ban iohsngew ba ki Doctor ki biang ha katei ka jaka ai jingsumar hynrei kam tip pat ïa ka jinglong jong ki nongtrei ha katei ka hospital, namar ki don ki nongtrei kiba trei casual kiba kham long heh pynban ïa ki Doctor, ïa ki bor pynïaid, ka daw ba dei ba la thung da ki Minister ne ki MLA bad kitei ki nongtrei kim tip ban burom ïa ki doctor bad ki nongtrei ba heh ha katei ka hospital.
“Ngi tip ïa ki jingduna haki CHC, ki PHC hynrei ngi don ka jingkyrmen ba ka Civil Hospital kaba don tang kawei haka district ba kan ai ka jingshakri kaba biang tam sha ki paidbah, namar kumba la ïakren bad ka MS ki nongtrei ki biang ha katei ka jaka ai jingsumar hynrei tang ka jingleh meng jong ki nongtrei ba kum ka seng kam kwah ban iohsngew biang nangne shakhmat” la ong u Bah Bipul bad kyrpad ruh sha ki paidbah kumba la don ki jaka ujor ba ki paidbah ki lah ban buh haki synduk ba la buh ha katei ka hospital bad kum ka seng kam pdiang ïa ka jingujor ki paidbah ha lynti ha syngkien nangne shakhmat.
Ka seng khatduh khatwai ka la maham ruh ïa ki nongtrei kiba ju leh meng bad kren da ki ktien ba khor sha ki paidbah ba kim dei ban dang mlien nangne shakhmat bad lada ka seng ka lap ne iohsngew biang kan sa shim pat da kiwei ki lad ki lynti kiba tyngeh.

Leave A Reply

Your email address will not be published.