Ba beh ka lyer jong ka NPP wan pynïasoh ki MLA na kiwei ki party: Conrad

Tura, Rymphang 12 : U Myntri Rangbah ka Jylla Conrad K Sangma ula ïai kyntu ïa ki paidbah hapoh ka Tura Constituency ba ki dei ban shim kabu ïa ka lyer jong ka NPP bad ban ai ka jingkyrshan ba pura ïa u kum u kyrtong jongki namar ym lah ban len ka lyer ka jur bad beh bha sha ka NPP ha kylleng ka jylla haduh ba wat ki MLA na kia Liang Pyrshah bad kiwei kiwei ki party ki la sngewthuh ba kam myntoi ban shu shah ieh shadien kumta kila wan ban pynïasoh ban ïakhun ïa ka elekshon na ka ticket ka NPP.
“Ki MLA ka Liang Pyrshah kila ïohi ba ka mon u paidbah ka noh bha sha ngi, lym kumta balei ba kito ki MLA na ka Trinamool bad ka Congress nalor ki seng riewlum kin wan ban pynïasoh sha ngi” buh jingkylli u Myntri Rangbah ka Jylla.
“U Jimmy D Sangma bad Marthon J Sangma na ka Trinamool Congress, Dr Ampareen Lyngdoh, Mohindro Rapsang bad Kimfa Marbaniang na ka Congress, Hamletson Dohling na ka PDF, Samlin Malniang na ka HSPDP bad kiwei kila wan rung sha ngi namar ki tip ba ka NPP kan thaw ïa ka Sorkar kaba skhem bad kaba tam ïa ka jingdonkam paid” ong u Conrad haba bynrap ba ki Liang Pyrshah hi kin ïoh tang hapoh 9 seat ynda la niew ïa ki vote la 2tarik Lber.
“Ki Nongthep Vote ka Tura kin ym thep vote tang ïa u Conrad Sangma marwei hynrei ïa u Myntri Rangbah ka Jylla bad ki vote jong phi kan ktah bha ïa ka Jylla baroh kawei bad ka pynmyntoi ïa kiwei. Peit ïa ka Rongjeng, phi vote ïa nga san snem mynshwa, phi ïarap ïa nga ban ïatreilang bad ki paidbah ka Rongjeng ban pynurlong ïa ka Civil Sub Division. Ka vote jong phi kan pynmyntoi bha ïa kiba bun” ong u Myntri Rangbah hapdeng ka jingrisa ki nongthep vote ha ka jingïalap elekshon hynne ka janmiet sngi U Blei ha ïew Tura.
U Conrad ula kren ruh halor ka jingkongsan jong ka Sor Tura kaba la shah iehbein ha ka roi ka par la bun tylli ki snem, ula ong “Tang ha kine ki san snem, ngi la lah ban pynkylla bad ngi la lah ban tehlakam ïa ka jingkyrduh um, ki streetlight, ki surok shnong bad ki madan ïalehkai na ka bynta ki samla”.
Halor ka jingkhanglad ban wanphai biang ki kai kaikhlaw bad ki jingjia umsnam ha ki snem bala leit noh, u Myntri Rangbah ula ong ba ka Sorkar jong u kal a trei khlem shongthait ban pynthikna ba ka jingshongsuk kan don hakhmat eh ha ka synshar khaddar.
Ula pynkynmaw ruh ïa ki jingkynthoh kiba antad ba ka Jylla kan nym lait na ki kam kaikhlaw hynrei ka Sorkar jong u kala pyni ba ki bakla.
“Ki bor syntiat jong ngi ki iai peitngpor beit-bun kim tip ba kumno ka sorkar ka treikam ha ryngkat bad ki Pulit. Hadien ki jingjia bthei bom ha Shillong, ki Pulit kila trei khlem shongthait ban kila lah ban tehlakam ïa ki jingjia bthei bom kiba shyrkhei kiba lah ban jia ha ki sngi bad ki taiew ban wan ha kito ki por” ong u Myntri Rangbah haba ïaroh ïa ka jingtreikam jong ki bor ka Aiñ ban khanglad ïa ki kam kaikhlaw ba kin mih biang bad ka jinglah ban tehlakam ïa ki kam dawa pisa jubor.
“Ka jingtieng jingsyier kaba don ha ka jingmut jingpyrkhat jong ki nongshongshnong kam don shuh mynta” ong u Conrad.