Shillong, Rymphang 12: Uwei u nongdie drok u la shah rahbor kylla ha ka kynhun ki runar hadien ba u la leit pynpoi ka song ba la thep ïa u drok ha East Jaiñtia Hills District ha ka sngi U Blei.
Ïa une uba la shah rahbor la ïoh ban pyllait im da ki Pulit jong ka East Jaiñtia Hills ryngkatlang bad ki hynriew ngut kiba rahbor.
U Superintendent of Police ka East Jaiñtia Hills u Jagpal Singh Dhanao u la ïathuh ba ki Pulit ki la ïoh jingtip ha ka por kumba 3:00 baje nohphai sngi ba uwei u briew uba la tip kyrteng kum u Masoom Choudhury na ka shnong Katigora Noonnagar, Assam u la shah rahbor ha ka kynhun ki runar kiba don 5-6 ngut, kiba shong ha kawei ka local taxi kaba don ïa u nombar ML-11-7172.
Mar mar, ki Pulit ki la pynlong ka jingap ktem ban wad ïa une uba la shah rahbor.
Dei ha ka por 4:30 baje janmiet, ka kynhun ki Pulit na Khliehriat Police Station ki la lah ban pyllait im ïa une u lanot bad ïa ki nongrahbor la rah noh sha Khliehriat Police Station.
Ha ka jingtohkit, la lap ba uba la shah rahbor u dei u nongdie drok uba la pynpoi ïa kawei ka synduk sadon ba la thep ïa u drok heroin sha kane ka kynhun, kiba la rahbor kylla ïa u tang shu ïoh pdiang ïa u drok.
Kane ka kynhun ka la dawa pisa T.5 lak ban pyllait noh ïa u, ong u Singh.
Shuh shuh, da ka jingïalam jong kine ki hynriew ngut kiba la shah kem, ïa ka synduk sabon ba la thep ïa u drok la ïoh kurup na ka local taxi bad ïa ki tiar ki tar la kurup noh hakhmat ka jingsakhi lang jong ki nongsakhi.
Hadien ba la thew, u drok u don ka jingkhia kaba 15 gram. Ïa ka kali local taxi bad 6 tylli ki mobile phone la kurup noh da ki Pulit.
Ïa ki hynriew ngut kiba donkti ban rahbor la ithuh kyrteng kum u Damewanhi Rymbai (28 snem), u Deibor Sutnga (31snem), u Hilari Dkhar (24 snem), u Banjop Sukhlaiñ (25 snem), u Wanmi Muksor (30 snem) bad u Deimon Shadap (29 snem).
Shuh shuh u SP u la ïathuh ba ki Pulit ki la register case ha Khliehriat PS bad ka jingtohhkit ka dang ïaid shakhmat ha kaba ïadei bad ka jingïoh kurup ïa u drok.
