Shillong, Rymphang 12 : Ka President jong ka ri India ka Draupadi Murmu, hynne ka Sngi U Blei kala thung thymmai ïa 6 ngut ki Lat ha ki jylla bapher jong ka ri India kynthup ïa u Phagu Chauhan kum u Lat ka jylla Meghalaya.
Ka President kala thung ïa u Justice (Retd.) S. Abdul Nazeer kum u Lat jongka Andhra Pradesh katba u Lat ba mynta u Biswa Bhusan Harichandan un leit ban shimti noh kum u Lat ka Chhattisgarh.
U Myntri khynnah barim ka sorkar pdeng u Shiv Pratap Shukla un shimti noh kum u Lat bathymmai jong ka Himachal Pradesh katba u Rajendra Vishwanath Arlekar pat yn leit ban shimti noh kum u Lat ka Bihar.
U Phagu Chauhan, uba long u Lat ka Bihar un leit ban shimti noh kum u Lat ka jylla Meghalaya.
U Myntri barim jong ka sorkar pdeng u C.P. Radhakrishnan ula shah thung kum u Lat ka Jharkhand katba u Lat barim ka Jharkhand u Ramesh Bais un leit shimti noh kum u Lat ka Maharashtra.
Ka jingshah thung u Bais kum u Lat kadei hadien ba u Bhagat Singh Koshyari ula resaiñ noh na ka kam Lat.
U Gulab Chand Kataria un long noh u Lat bathymmai ka Assam katba u Lakshman Prasad Acharya un long noh u Lat ka Sikkim.
U Lat Ganesan uba long u Lat ka Manipur un leit ban shimti noh kum u Lat ka Nagaland, katba u Anusuiya Uikye uba long u Lat ka Chhattisgarh un shimti noh kum u Lat ka Manipur.
U Brig. (Dr.) Shri B.D. Mishra (Retd.) uba long u Lat barim ka Arunachal Pradesh bad Meghalaya ula shah thung noh kum u Lat ka Ladakh.
Ha ka jaka u BD Mishra, ïa ka kam Lat yn shimti noh da u Lat ka Bihar u Phagu Chauhan, bad u Lat ka Himachal Pradesh u Rajendra Vishwanath Arlekar un leit ban shimti noh kum u Lat ka Bihar.
Kane ka jingshah thung ki Lat ka jylla kan sdang treikam naduh ka sngi ba ki leit ban shimti ïa ka kam ha ka ophis jong ki.
Ka President kala mynjur ruh ïa ka shithi iehnohkam jong u Radha Krishnan Mathur kum u Lat ka jylla Ladakh.
