Shillong, Rymphang 12 : Ka General Secretary jong ka BJP Mahila Block Mandal Mawsynram, Kong Aidain Dkhar ha ka sngi Saitjaiñ ka la pynbna ba ka la iehnoh ïa ka kam ba ka bat ha ka party BJP.
Haba pynbna ba ka jingiehnoh ïa katei ka party kum ka nongïalam ba hakhmat jong ki longkmie BJP, ka Kong Aidalin ka la ïathuh ba ka daw tynrai hi kadei namar kam sngew suk satia ba kan don ha katei ka party.
Shwa kane, ka la ïathuh ba ka la bat ïa ka kam General Secretary jong ki longkmie naduh ka por ba u Bah HM Shangpliang u don ha ka Congress bad ha ka por ba u leit sha ka TMC ruh la pynskhem biang ïa ka ban long kum ka General Secretary.
Nalorkata, ka ïathuh ruh ba wat hadien ba u MLA jong ki u leit sha ka BJP ka mynsiem jong ka, kam suk satia hynrei la shu pynbor ïa ka ban donlang. Ka la ong ba ha u Nohprah ka la rai ban iehnoh ïa katei ka kam hynrei u MLA um shym la shah satia ïa ka bad dei na kane ka daw ka la hap ban shim ïa katei ka rai ban resaiñ noh na ka BJP Mahila Block kum ka General Secretary.
Ha kane ka sngi, ka la ïathuh ruh ba katkum ka RTI la paw ba ka la ïoh ïa ka skim MLA hynrei kam shym la ïoh pdiang satia bad haba ka wad jingtip la lap ba la don ba sei ïa ka pisa.
