Na ka jingkwah nang Phareng poi leit pule Lyngdoh u Phadar Wilbert Marweiñ

“Kan long ka mon jong me” ki kyntien im sngi”

Shillong, Rymphang 12: U Bishop ba la shah jied (Bishop Elect) jong ka Jylla Niam Nongstoiñ u Phadar Wilbert Marweiñ uba la shah thung kum u Bishop bathymmai ha u Pope Francis ha ka 4 tarik mynta u bnai yn sa pynkyntang kum u Bishop bapura ha ka 16 tarik, ïaiong 2023 ha Nongstoiñ.
Ha ka jingïakren bad ka Don Bosco Media Network, Shillong, u Bishop Elect Wilbert u la ïathuh ba ka jingpynkyntang Bishop ia u kan sa long ha sngi kyrpang jong ka Divine Mercy Sunday ha ka 16 tarik, Ïaiong, 2023 ha Nongstoiñ.
Haba iathuh shaphang ka jingïaid lynti ban poi shaduh kane ka kyrdan kaba jwat, u Bishop Elect u ïathuh ba ka jingïaid lynti jong u ka beit ka jingïalam lam lynti jong u Blei da ka jingsynran jong ka Maria Theisoitti ha manla ki khyllipmat ka jingim jong u.
“Kum u khynnah ngam ju leit skul, hynrei nga dei u khynnah ap masi bad ka jingpoi leit skul ka dei namarba nga ïohi ba ki para khynnah ki leit skul bad nga kwah ban leit peit aiu ha kata ka skul ki leh bad nga leit khlem kot khlem sleit bad nga leit skul ruh teng teng ban shu shongkai lap miet bad ki para khynah,” u la ong.
U la iathuh ba dei u Phadar Phillip Giraldo uba la phah ïa u Phadar Alex Dkhar ban khot ïa u la u don neem ka jingangnud ban pule phadar.
“Ha kaba nyngkong nga la pyneh bad ong ha u Phadar Alex kumno kum ma nga ngan leit lah ban long Phadar namarba ngam ju ïohi ba u Phadar Philip un bam ne leit paiñkhana bad nga ong kum ma nga ngan lah shano hynrei namarba ki la wan khot nga shu ong ngan leit la ka leit. Ha ka jingshisha i Pa im shah hynrei nga leit beit ban leit pyrshang. Nga la leit ha Savio Juniorate, Mawlai bad nga khlem sha jied bad nga la hap wanphai noh sha shnong,” u la ong.
“Dei ha u snem uba bud nga leit sha St. Paul’s Seminary, Upper Shillong ban pyrshang namar nga kwah palat ban nang kren Phareng. Ha kane ka kynti ngam shym la ïathuh shuh ha iing ba nga mut leit sha kane ka jaka nga shu thok ïa i Pa bad nga rah tang ka tapmoh bad kawei ka sopti, kawei ka patlun bad thok ïa i Pa ba nga mut leit saitjaiñ hynrei nga kiew ha ka bus ban leit Shilong sha Seminary da ka jingïalam lem uwei paralok u Bah Hector bad nga la sah ha Seminary namar ki Phadar ki la pdiang ïa nga bad nga la ïai sah ha Seminary da ka jingkwah ban nang kren Phareng,” u la bynrap.
U la ïathuh ruh katba u dang sah ha St Paul’s Seminary tad haduh ba un da leit sah ha Oriens Theological College, Shillong u ju duwai barabor ha ka Maria Theisotti ba kan ïarap lem ïa u bad ban ai ka dak ba ïa u la khot bad la jied ba un long Lyngdoh Sohblei bad u la ïoh shisha kat kaba u pan.
“Ynda nga la poi ha Oriens Theological College, Shillong nga la sngewthuh ba kane ka dei ka jingim kaba eh bha bad nga ju duwai barabor bad nga ju phylliew jingmut bad u paralok ba ngi la ialong kum shipara u Phadar Richard Majaw (Vicar General ka Jyllaniam Bah Shillong) bad ngi la rai ban ïaid shakhmat bad nga la leh kumta tad haduh ba nga la shah pynkyntang Lyngdoh Sohblei ha u snem 2003,” la ïathuh u Bishop Elect.
U la ïathuh ruh ba u la trei shipor kum u Administrator ha Oriens Theological College, Shillong hadien ba u (L) Archbishop Dominic Jala u la khot ïa u ban leit trei noh ha katei ka jaka ban pynkynriah noh na Ummulong. “Ha ka banyngkong nga la pynpaw ia ka jingshem jingeh ban leit trei lang bad kijuh ki Phadar kiba la hikai ïa u ha Oriens Theological College, Shillong hynrei da ka jingpyndem ha ka jingpynïaid jong ki bahalor nga la kohnguh ïa kaei kaba ki bthah,” la bynrap u Bishop Elect.
“Dei ynda nga la poi ha Oriens Theological College, Shillong, ki Phadar kiba dei ruh ki Professor ki la ai jingmut ba ngan leit pyntbit ha ka jingpule ba kham shalor. Nga la leit pule ïa ka Licentiate in Missiology ha Pontifical Urban University ha Rome lyngba ka Scholarship kaba u Archbishop Victor Lyngdoh u la mynjur ha kato ka por mynba u dang long u nongsharai jong ka Jylla Niam Nongstoiñ,” u la ong.
Shuh shuh u la iathuh, hadien ba u la pyndep ïa ka Licentiate in Missiology na ka Pontifical Urban University u la pan jingbit na u Archbishop Victor uba dang long u Bishop jong ka Jylla Niam Nongstoiñ ha kato ka por ba un trei ha ki bynta ka Europe kum shi bynta ban mad ïa ka jingim ki nongshong shnong kitei ki ri.
“U Bishop jong ka Nongstoiñ ha kato ka por u la mynjur bad pynshlur ruh ba ngan trei lada nga ïoh lyngkha trei bad nangta nga wad lyngkha trei bad nga la ïoh ha ka jylla niam Cosenza, Italy bad nga la sharai kum u Assistant Parish Priest ha Calabria bad dei hadien san snem ba u Bishop jong nga u la khot ba ngan trei baing noh ha Nongstoiñ namar ka jylla niam ka donkam ïa nga,” u la ong.
“Ba ngan wanphai biang shane ruh nga hap ïakhun ha lade namarba ka soskular ba ngi la ïasoi bad ka jylla niam Cosenza bad dei da ka jingthoh shithi u Archbishop Victor ba ka Jylla Niam Cosenza ka la pyllait ba ngan wan phai sha ka Jylla Niam la jong,” u la bynrap.
U la ïathuh ruh ba ka ‘tien im sngi kaba u la jied ka long, “Kan Long Ka Mon Jong Me.” “Ka jingjied jong nga ïa kane ka kyntien im sngi ka long namarba u Apostolic Nuncio u Most Rev. Leopoldo Girelli, u la pan jubab na nga katba u dang don ha Delhi la nga pdiang neem ïa kane ka jingtyrwa ba ngan shimti kum u Bishop bad ka jingïaleh ka long kaba jur haduh katta katta bad nga lap jubab ha ka jingduwai haba nga pule ïa ka kitab Psalm nga lap ïa kane ka kyntien bad nga la shim ïa ka rai ba ngan kohnguh ïa kane ka mon jong u Blei wat hapdeng ka jingbym long uba bit bad hapdeng ki jingduna kiba bun ban shimti kat ïa kane ka kam. Dei na kane ka daw ba kane ka kyntien nga shim kum ka ktien im sngi jong nga,” u la ïathuh.
U la ong ba kum u Bishop jong ka Nongstoiñ u kwah ba ha kane ka Jylla Niam kan don ka jingieid ïa ki briew bad ïa ka kam ba la pynkhamti bad ban don ruh ka jingieid ïa la ka jong ka kam ba la bynshet. U la ong ruh u kwah ban ïohi ba ka Jylla Niam kan kiew ha ka jingngeit bad ka jingieid para briew.
U Bishop Elect u la ong ba ka jingpoi jong u sha kane ka kyrdan Bishop ka la dei ka kam bamaïan jong U Blei bad ka jingieid kyrpang jong U Blei ïa u bad kumjuh ka jingpasiaw lem jong ka Kmie jong u Blei ka Maria Theisotti bad ka jingkohnguh jong u ïa kaei kaba ki nongpynïaid ki btah ïa u ban leh.