Shillong, Rymphang 12 : Ki hynniew ngut ki kyrtong kiba ïakhun ïa ka elekshon ban mihkhmat sha ka iingdorbar thawain (MLA) na Mawlai constituency ha ka sngi Saitjain ki la khlei ïa la ki jong ki nia ki jutang na ka bynta ban pan ïa ka jingkyrshan na ki paidbah ha ka common platform ne rynsan ïalap elekshon paidbah ba la pynlong da ka Dorbar Shnong Mawlai Iewrynghep ha phyllaw jong ka Mawlai Presbyterian Higher Secondary School, Iewrynghep.
Kine ki hynniew ngut ki kyrtong ki kynthup ïa Bah Process T Sawkmie, MLA barim bad u kyrtong ka UDP, Bah Teibor Pathaw, MDC ba mynta, kyrtong kaNPP, Bah Marbud Dkhar, kyrtong ka Congress, Bah Brighstar Marbaniang, kyrtong ka VPP, Bah Stepbourne Kupar Ryndem na ka TMC, Bah Wandonbok Jyrwa na ka BJP bad u kyrtong shimet u Bah Tarcicious Mawlot.
Na ka liang u Bah Process u la pynkynmaw ba dei ha ka por ba u bat kum u Myntri ka tnad Sports u la pynïoh ïa ka Indoor Sport Hall ha Mawlai Iewrynghep, u la shna ïa ki surok ha ki jaka bym ju lah ban iaid kali, ki lynti ïaid kjat bad kiwei kiwei.U la pynkynmaw ruh ba ha ka por u covid da ka jingkyrkhu jong U Blei la kner ïa la ki kti ban ïoh ban ïarap ïa ki paidbah ka thain.
Halor ka pule puthi u la ong ba un pyrshang ban kyntiew ïa ka Mawlai Christian College sha ka Mawlai People College, ban kyntiew ïa ki skul Secondary sha ka Higher Secondary.
Halor ka koit ka khiah u la pynpaw ba u don ïa ka jingthmu ban buh sa kawei ka PHC ha Mawtawar bad ka Sub Centre ha Nongkohlew.
Halor ki khun samla kiba khlem kam khlam jam u la pynpaw ba thaw lad thaw lynti ba ki khun samla kin lah ban seng kam la jong, da kaban ai jingïarap ïa ki ha ki mang tyngka bapher bapher.
Katba na ka liang u bah Teibor u la pynpaw ïa ka jingangnud jong u ba u kwah ban pynlong ïa ka Mawlai ka Model Constituecy, ka konstitwensi ban long nuksa ïa kiwei, ban kyntiew ïa ka, kan long ka green Mawlai, kan don ka jingshai street light bapher bapher, ban pyntreikam ïa ka skhim sorkar kmie kaba la pyllait ha u snem 2019 ka Shyama Prasad Rurban Mission. Da kane lah ban pynshlur ïa ki shnong nongkyndong ban kyntiew ïa ki bad lada u jop kin pyntreikam ïa ki.
Na ka liang u Bah Teibor pat u la ong ba un phai khmat sha ka pule puthi ban wanrah ïa ki smart class, u ïathuh ba ka don ka skul ha Mawtawar kaba la pei um ha ka por slap bad kumta u la wanrah da ka skhim na Assam Rifle ban maramot ïa ka. U la ïathuh ruh ba u la wanrah ïa ka skhim na GST ha Mawlai Phudmuri bad u ong ba un kham phai kkhmat ruh sha ki skul kiba bun ki dei kiba duk kiba leit.
Halor ka koit ka khiah, u ong ka Nehru dispensary kaba don ha Mawlai Nonglum ki dang shongwai haduh mynta, kumta ka thong jong u kan long ban pynïoh noh la ka jong ka jaka.
U pynpaw ïa ka jingpangnud ban peit ïa ki khun samla ha Mawlai, na ka bynta ki khun samla un wanrah ïa ka Youth Centre kaban ïalam lynti ïa ki. Shuh shuh u ong ruh ba um lah ban kular ban ai kam sorkar, hynrei un ïalam lynti na kine.
“Lyngba kane ka youth centre kin pynmih ïa ki IAS, ki IPS kaban long ka jingmyntoi ïa ki jaitbynriew.” U ong ruh ba ka Prime Hub ka long ka lynti ïa ki khun samla kiba kwah ban ieng ha la ki jong ki kjat, kaban ïalam lynti ïa ki.
Kawei pat ka bynta kaba u kdew ka long halor ka sienjam ba u shim ban plie lad ïa ki samla ha ka ïohkam ïohjam. U ong ruh ba lada ym dei ba sdang ma u ïa ka jingai kam ai jam, la shlei da ki bar jylla ha kane ka thain.
Halor u pud u sam u la ong ba la 50 snem ym don ba shimkhia ïa u pud u sam hynrei ka NPP ka la shimkhia ïa ka, dei na kane ka daw ba u la leit ïasoh bad kane ka party.
U kyrtong ka VPP u la pynpaw ba u la ieng ïakhun ïa ka elekshon halor ki ar tylli ki nongrim, ka synshar khadar kaba khuid ba suba bad ban pynneh ïa ka hok long trai, kum u trai ri trai muluk
“Khlem ka synshar khaddar ba khuid ym don jngmut ban wanrah ïa ki kam pynroi bapher bapher namarba ka bampong ka la ktah ïa ka jylla.”
U la ong ruh ba ka bynta kaba ar ba ka VPP ka don ka long halor ban pynneh ïa ka hok long trai, kum u trai ri trai muluk, kum haba pynneh ïa ka khyndew ka shyiap, ka riam ka beit, la ka long ha ka jingngeit, la ka long ha ka jingbam, kin pynneh bad dei ïa kane ba ka VPP ka ieng.
U ong ruh, ha ba ym don ka jingïohi jngai ki briew kin ïap ha bym don ki nongïalam ba ïohi jngai ka ri bad ka jaitbynriew kan ïap noh, ka VPP ka don ïa ka jigïohi jngai bad dei ha kane ka nongrim ba u ïakhun na kane ka party.
U kyrtong ka Congress u la kren shaphang ka sorkar MDA, ïa kaba u la ong, kaei ba ka NPP ka leh bad kaei ba ka UDP ka leh, ym donkam ban batai shuh, ki paidbah ki la sngewthuh kumno ban jied ïa ki nongmihkhmat.
U ong ruh ba um dei u Contractor, hynrei u dei u nongïada jong ki bad um dei u nongsam hynrei u nongsaid ain jong ki paidbah.
Katba na u kyrtong ka BJP u la pynpaw ba ka jylla ka la ïaid la 50 tylli ki snem khlem ïoh nongthawaiñ lait noh tang u bah Martin Majaw uba la thaw ïa ka ain ba khanglad ïa ki bar jylla ban thied jaka. U la pynpaw lada ki paidbah ki jied ïa u un long u nongthawain ym u nongmihkhmat.
U Bah Stepburne na ka TMC pat u la pynpaw ba kin pynurlong ïa ki jingkular kaba ki la pyllait katkum ka manifesto.
Lait noh u kyrtong shimet u bah Tarcicious Mawlot uba la pynpaw ba u ïakhun ïa ka elekshon ba u shah shkor ïa ka jingpasiaw na U Blei, uba la maham ïa u ba un pan jingkyrshan bad ban kynthoh ïano ïano ki kyrtong ba ïakhun pyrshah.
