Sngewpyrshah ki nong Pynursla ba shah kynthoh u Bah Prestone Tynsong haman ki jingjia

Shillong, Rymphang 12 : Ki longkmie na Pynursla constituency ki la pynpaw ïa ka jingsngewrem halor ka jingshah kynthoh ba harukom ïa u MLA jong ki, Bah Prestone Tynsong ba dei ruh u Symbud Myntri Rangbah ka jylla.
Haba kren bad ki lad pathai khubor, kitei ki longkmie ba kynthup ïa ka Kong Batrinam Khongkrom na Nohwet bad Kong Latyngshaiñ Khongmawloh na Pynter ki la ong ba kum ki nongshong shnong na ka thaiñ ki sngewdiaw ban ïohi ba haman la ki jingjia ba jia ha kane ka jylla la shu kynthoh beit tang ïa u Bah Prestone.
“Ngi sngewrem haba ki kynthoh beit tang ïa u Bah Prestone. Kine ki jingkynthoh sngew kumba u dei u Bah Prestone uba bat ïa u shabi ha ka jylla baroh kawei. Balei tang na ki daw shimet kin kynthoh bad kin shna ïa ki dur ki dar (dur bula). Kane ka pyni ïa ka jinglong biej jong ki,” ki la ong.
Shuh shuh ki la ong ruh ba kitei kiba kynthoh kim ïohi ïa ki kam kiba utei u nongmihkhmat jong ki u leh hynrei ki nang tang ban shu kdew kti. Ki la kynnoh kylla ruh ba ki kam bishni, pihuiñ, wad daw, wohnïa kine baroh ki dei na ka jingpang rim ha ri Khasi ha kaba tang shu ïohi ba ki kiew ki sdang ban thawlad ban ring bad tan noh shapoh.