Ha District Council, ngi la thawaiñ bat khyndew, ka Assembly pat ka thawaiñ aïu?

Shillong, Rymphang 12: U Kyrtong jong ka UDP na Mylliem, u Bah Mitchel Wankhar, u la ong ba u sngew sarong ba kum u dkhot jong ka EC ha KHADC hapoh ka jingïalam ka UDP, la lah ban thaw ïa aiñ bat khyndew kaba la pynsuk shibun ïa ki paidbah.
Haba ïakren bad katto katne ngut ki nongthoh khubor, u MDC jong ka Laban, u la ong ba ka aiñ bat khyndew ka la pynsuk shibun ïa ki paidbah, namar baroh shikatta, ki paidbah ki hap rejistar ïa ki khyndew jong ki sha ophis DC lyngba ka tnad Revenue bad ka dor bai rejistar ruh ka long kaba rem. Hynrei mynta lyngba ka aiñ ba la wanrah da ka KHADC, ki paidbah ki lah ban wan rejistar ha ka dor kaba jem bad ki paidbah ba shong ba sah ha khappud lei lei ki ïoh lad ban rejistar khlem donkam ban da siew pisa.
Nangta ka Building Bye Law kumba la aiti da ka sorkar jylla, ka KHADC mynta dang pynkhreh ban thung ïa ki Enjinar kiban peit ïa kane ka kam, khnang ba kan pynsuk ïa ki paidbah haba ki shna ïing shna sem.
“Ngi ha District Council, ngi la thaw ïa kine ki aiñ, hynrei ki MLA ba mynta ki la thaw-aiñ aiu na ka bynta ki paidbah”, la ong u MDC ka Laban.
Halor ka jingmih jong u ban ïakhun na Mylliem, u Bah Mitchel, u la ong ba dei ha ka por jong ka jingwan lynshop ka jingpang COVID 19 ba u la ïohi ïa ka jingsahdien ka Mylliem Constituency, haba ki paidbah nongrep ki la ïam la lynñiar wat hapdeng ka jingpynmang ka sorkar 25 lak na u MLA bad 15 lak na u MDC. Kum u EM jong ka KHADC, u la lah ban leit ai jingïarap ïa ki nongrep da kaba ai symbai, ban ïarap lyngba ki ïew ïa ki nongrep. Nangta u la ïohi ruh ïa ki jingeh ki paidbah ha ka liang ki surok bad ki lynti ki syngkien ka umbam umdih. “Nga la ïohi ba ki paidbah ha Upper Shillong kum ka Lummawbah, Nongkseh, Umlyngka bad kiwei kiwei ki shnong kiba bun ki hap ban shu thied um”, u la ong bad kular ba lada u jop un peit ïa ka jingpyntreikam noh kham sted ïa ka Greater Shillong Water Supply Scheme kaba la suki palat.
Nangta ka jingsuki ka jingpyntrei ïa ka jingpynheh ïa ka surok na Shillong sha Tamabil khamtam ha Upper Shillong kaba la suki na ka jingsangeh noh ka jingtrei na ka daw ka jingphet noh ka kompnei kaba shna ïa kane ka surok. U la ong ba un peit ruh ïa ka eh ka shon ki samla ha ka liang ka ïoh kam ïoh jam, ka jingpynbiang ïa ki madan ïalehkai bad kiwei kiwei.