Ka don ka jingïasngewthuh jingmut hapdeng ka Congress bad ka NPP: George B. Lyngdoh

Shillong, Rymphang 12 : U nongïalam ka AITC bad Chief Whip ka Liang Pyrshah, Bah George Lyngdoh ha ka sngi U Blei u la kynnoh ba ka don ka jingïasngewthuh jingmut hapdeng ki nongïalam jong ka Congress bad ka National People’s Party ha ka jylla.
Katei ka jingkren jong u, kadei hadien ba ka la mih ka jingkynthoh na u General Secretary ka AICC, u Jairam Ramesh uba la ong ba ka don ka jingïadei kaba jan hapdeng ka TMC bad ka NPP, UDP bad BJP. U Ramesh u la kynnoh ruh ba ka TMC ka dei ka team – C jong ka BJP ha Meghalaya.
U Bah George u la ong ruh ba um poi pyrkhat satia kum kitei ki jingkynnoh kin mih na u National Secretary jong ka Congress namar u dei u briew u briew uba la ngam jylliew bha ha ka saiñpyrthei. “Ngi dei tang mangi ka bor kaba lah ban ïakhun ïa ka sorkar NPP -BJP kaba ha kine ki khyndiat por wat ki nongïalam jong ka Congress ruh ki la leit ban kyrshan lang bad kane ka paw ba ka don ka jingïadei kaba jan hapdeng ki nongïalam jong ka Congress bad NPP,” u la ong.
Shuh shuh u ong ruh ba ha ka jingshisha u Ramesh u la dei ban ïohi kumno ka Congress ka la dep ban pynpaw ba ki kloi wat ban kyrshut tyrpeng bad ka NPP.
Utei u nongmihkhmat na Umroi u la ong ruh, “Ngi la dep tip lypa ruh ba ka NPP kadei ka BJP bad ka mask bad kane ym dei tang ha ki rynsan ïalap elekshon hynrei mynta ngi la ïohi ruh ba ka BJP bad NPP ki donlang hajuh. Ngi ïohi ruh ïa ka jingkyrshan ba la pynpaw da ka Congress ha ka jylla ïa ka NPP bad ruh ïa ka BJP.”
Kumta, u la ong ba utei u heh Congress u la dei ban sngewthuh shwa ïa ka politik ha kane ka jylal ha shwa ba un kren ïa kano kano kum u briew uba la ïaw bha ha ka saiñpyrthei ha ka Ri.
Shuh shuh u la ong ruh ba ïa mynta, dei tang ka TMC kaba don ha ka Liang Pyrshah marwei ha ka jylla kaba ïakhun na ka bynta ka hok jong ki paidbah bad ruh ban ïada ïa ki hok jong ki.