Pynshai ka Executive Committee ka Dorbar Shnong Lumdiengjri halor ka khubor pyllait skhim

0

Shillong, Rymphang :Ka Executive Committee jong ka Dorbar Shnong Lumdiengjri kaba la long ha ka 4 tarik mynta u bnai, ka la shim ïa ki rai ban pynshai paidbah halor ka jingmih khuor ha ka 4 tarik mynta u bnai halor ka mat “Paw ka kyrteng u Bah Ransom Sutnga ba pyllait skhim u Conrad, mudui ka UDP sha u CEO” kata ha kaba ïadei bad ka jingtrei ha JJM Nichols Roy Model Trust ha Lumdiengjri.
Halor kane na ka liang ka Dorbar Shnong ka la ong ba kam don jingtip ei ei shaphang kata ka jingtrei ban pyntrei hapoh shnong, bad kumno ka lah ban long ba ki bor kiba dei khmih ïa kane ka kam kin ïaid lait ïa ka shnong.
Halor ka jingkam jong I Bah Mohendro Rapsang MLA barim, uba long ruh u kyrtong u ban ïa aireng ha kane ka ilekshon ka ban wan jong ka seng NPP na 18 West Shillong constituency lyngba ka jingkren ha ki social media hadien ba u la dep ban file nominations, I la kam ba I la pyndep lut ïa ki kam ba ki Dorbar Shnong ki la ai lane kyrpad na I.Kane ka jingkam ka jong I ha kaba ïadei bad ka shnong Lumdiengjri ka long kaba bakla namar na ka liang ka Dorbar Shnong kaba thymmai kaba la shimti naduh u bnai Rymphang 2022 kam shym la ïoh pdiang lane ïohi wat tang kawei ruh ka jingkyrpad ba kan urlong lane seisoh.Hadien ba ka Dorbar Shnong ka la ai da ki jingthoh ha kaba ïadei bad ki jingdonkam jong ka shnong naduh u bnai ïaïong 2022.
Ka Dorbar Shnong ha u kyrwoh lyngba u Bah Rahul Kharpor, Secretary bad Bah Jolsing Rani Rangbah Shnong ka la pynpaw ruh ba hadien ba ki la dep ban ai da ka jingthoh ïa ki jingdonkam jong ka shnong, kim shym la ïoh satia ïa ka jubab na I, kata watla ki la leit ban ïakynduh bad pynkynmaw biang ïa ki jingdonkam jong ka shnong, pynban ka jubab kaba ki ïoh na I ka long ba ym don pisa shuh na ka MLA skhim.Ka daw kaba I la ai ka long ba ki la slem palat ba kin ai jingthoh, kumta ka Dorbar Shnong kam banse ban shu sngap noh.
Hynrei, ka long kaei kaei kaba pynlyngngoh haba ki ïohsngew pat ha ka jingkren ka jong I ha ka prokram ba I la pynlong ban sam ïa ka jingai sngewbha lane ka gift ka jong I, kaba da u pressure cooker sha ki paid nongshong shnong jong ka constituency bad kaba I la da ong ruh ba ka pisa na ka bynta katei ka skhim ba kam dei na ka pla ka jong I hynrei ka dei na ka pisa ba lah tam na ka skhim MLA kaba kot haduh 1 klur 80 lak, kaba im lah pyntreikam shuh na ka bynta kiwei kiwei ki kam namar bym don por shuh.
Kumta na ka liang ka Dorbar Shnong Lumdiengjri ka kwah ban pyntip sha ki paid nongshong shnong bad ban buh jingkylli ruh ïa u nongmihkhmat barim ba kaei ka daw kaba la pynlong ïa I ban kyntait ïa ki jingkyrpad ne jingdonkam jong ka shnong kiba ki la buh hakhmat jong I bad ban peit ne leh shiliang khmat ïa ka shnong jong ki.Ha kajuh ka por ki kyntu ruh ïa I ban pynshai lada i don kaei kaei lane kano kano ka daw kaba I pyrshah ïa ka Dorbar Shnong bathymmai kaba la pynlong ïa I ba in shu kyntait ïa ki jingkyrpad bad ki jingdonkam jong ka shnong.
Kyntang ïawai ka Dorbar Shnong ka kwah ban ong ba kam don jingpyrshah ne ïashah liang ïa kano kano ka party ne ïa uno uno u kyrtong ne ban pynthohbria ïano ïano ruh, hynrei ka kren beit thik tang ïa ka jingshisha kumba ka long.

Leave A Reply

Your email address will not be published.