La pynlong ïa ka Dorbar Bah ba lai ka Kur Mawrie halor ka phang “Im Ka Kur Im ka Jaidbynriew”

Shillong, Rymphang :Ka Dorbar Kur Mawrie HQ Laitkor, Mylliem Syiemship ha ka 6 tarik mynta u bnai ka la pynlong ïa ka Dorbar Bah ba Lai jong ka Kur Mawrie halor ka phangpdeng “Im Ka Kur Im ka Jaidbynriew,” ha madan Laitkor.
Ha katei ka Dorbar la wan ban ïashim bynta da ki hajar ngut ki para kur na kylleng sawdong ki shnong jong ka Bri u Hynñiewtrep kiba kynthup haduh 14 tylli ki Unit Kur abd na ki 22 tylli ki shnong.
La pynïaid ïa kane ka Dorbar da u Bah Bikson Roy Mawrie President ka Seng Samla Kur , ka jingduwai sdang na u Mama Romeo Mawrie Rangbah Kur, ka jingkyntiew lama na I Kong Jipsy Mawrie President Seng Kynthei jong ka Kur, na u Bah Leonard Arun Mawrie president, ka jingpynsngew halor ka jingtreikam jong ka Dorbar Kur da u Bah Johnystar Mawrie Genl Secretary bad ka jingkren halor ka phangpdeng da I Fr (Dr) Barnes Mawrie SDB Adviser ryngkat ka jingpynskhem ruh ïa ki nongkitkam jong ka Seng Kynthei Kur bad Seng Samla Kur abd la ai ka jingkren ai khublei na I Kong Lucy Mary Mawrie Genl Secretary ka Seng Kynthei Kur.
Ha katei ka sngi la plie ruh ïa ka ophis treikam bathymmai jong ka Dorbar Kur da u Bah Amit Mawrie Vice President kaba la noh synñiang da I Meiduh (L) Destina Mawrie bad ka la don ruh ka jingpynkup burom ba kyrpang ïa ka nam bad ka kyrteng jong I halor ka jingnoh synñiang ïa ka Kur.
La pynphuh pynphieng shuh shuh ïa katei ka Dorbar da ka jingrwai theme na ka liang ka Seng Samla Kur bad ka jingrwai bad jingshad na ki tyngshop ki purom bad ki kaitor ba pawnam jong ka Kur Mawrie kumjuh ruh la pynshongkun shuh shuh da ka jingshad tynrai na ki Unit Kur bapher bapher nalor ka jingtem jingput na u DJ jong ka Kur Mawrie.
Shuh shuh ha katei ka sngi ka la don ruh ka jingsam khusnam kyrpang ïa ki Samla Kur kiba pass bha ha ki jingpule bapher bapher bad ka jingai burom ïa baroh ki Riew rangbah abd Longkmie kiba la noh synñiang kylluid mynsiem ïa ki jinglut jingsep na ka bynta ka jingpynlong ïa kane ka Dorbar Bah ba Lai jong ka Kur Mawrie.Kane ka long katkum u kyrwoh lyngba u Bah Johnystar Mawrie, Genl Secretary Dorbar Kur Mawrie.