SHILLONG, ïaïong 02: U Kevin Lyngdoh Sangriang uba na Mawkyrwat kaba hap ha South West Khasi Hills District, u la wanrah nam bad burom ïa ka Jylla da kaba khur ar tylli ki takma ksiar ha ka jingïakop ñiah saikil kaba la tip da ka 21st National Mountain Bike Championship 2025 kaba la long ha Morni Hills, Haryana.
U Kevin Lyngdoh Sangriang, uba dang 15 snem rta, u la khur ïa kitei ki takma ksiar ha baroh ar tylli ki jingïakop, kata ha ka Cross Country Time Trial bad Cross Country Olympic (XCO), kaba la wanrah ïa ka jingithuh na ka ri ïa ka sap ñiah saikil kaba dang kiew ha Meghalaya.
Na bynta kane ka jingleit ïashim bynta, u Kevin Lyngdoh Sangriang u la pyndonkam ïa ka pisa kaba T.1 lak ban thied ïa ka saikil, kaba la kyrshan da u Myntri Rangbah ka Jylla, u Conrad K. Sangma.
Hadien kane ka jingjop jong u Kevin Lyngdoh Sangriang, na ka liang jong u Myntri Rangbah ka Jylla u la ai ka jingïarap da kaba bynrap ba ka lawei hakhmat jong une u khynnah ka long kaba phyrnai.
“U Kevin u don ïa ka lawei kaba phyrnai ha khmat jong u. Ka 1 lak kaba ai jingïarap lyngba ka CM Fund kaba u la pyndonkam ban thied ïa ka saikil (cycle) jong u ka long kaba kham kordor! To nang ïai tyngshaiñ, Kevin!” katkum ki kyntien ba la thoh da u Myntri Rangbah ka Meghalaya, u Conrad K Sangma, ha rynsan social media, ban pynpaw ïa ka jingkmen halor katei ka jingjop.
Ka jingjop jong une u khynnah ñiah saikil ka dei ka mawjam kaba kongsan na ka bynta ka jingkiew ha ka kam ïalehkai ha Meghalaya, khamtam ha ki distrik kiba hap ha ki jaka kyndong jong ka jylla. Ka jingbei tyngka jong ka Sorkar ha ki tiar ïalehkai lyngba ka Chief Minister’s Fund ka la paw ba ka la long ka jingmyntoi, namar ki nongïalehkai kum u Kevin Sangriang ki la poi sha ka nam ha ka ri.
Kane ka Championship la pynlong da ka Haryana Cycling Association hapoh ka jingpeit jong ka Cycling Federation of India, bad la ju pynlong man la u snem ha ki jaka bapher bapher ha kylleng ka ri India, ka dei ka jingïakob ñiah saikil kaba la pawnam bha ha ka ri.
