Ar tylli ki mawnongrim ban shna ïa ki madan ïalehkai plie u Bah Pius Marweiñ ha ka thaiñ Nongnah

Mawkyrwat, K’lyngkot 08: U bah Pius Marweiñ uba dei u nongmihkhmat jong ka Ranikor Constituency myn ha ka sngi saitjaiñ jong ka taïew u la ïoh ban plie ïa ki ar tylli ki mawnongrim ban shna bad pynbha ïa ki ar tylli ki madan ïalehkai hapoh jong ka thaiñ Nongnah kata ïa ka madan Mawkyndeng kaba dei jong ka Kur Lyngkhoi Sports & Cultural Welfare Organisation bad ka madan Mawjongjaka Nongnah Nongkdiat-Nongtwah, South West Khasi Hills District.
Lah ban kdew ba ïa ka jingshna pynbha ïa ka madan ha Mawkyndeng ka dei lyngba ka Chief Minister’s Special Development Fund (CMSDF) kaba ha ka jingmang pisa kaba T. 30/- lak tyngka katba ïa ka madan ha Mawjongjaka Nongnah Nongkdiat-Nongtwah ka dei lyngba ka State Sports Council jong ka Jylla Meghalaya ha ka jingmang pisa kaba T. 50/- lak tyngka.
U bah Pius Marweiñ haba kren ha ka jingïalang u la pynpaw ba ka jingïoh ban buh ïa kum kitei ki kam pynroi ha kaba ïa dei bad ki madan ïalehkai kan long kawei na ki lad ban ai mynsiem ïa ki samla jong ka dong ka thaiñ ba kin nang kiew ha kane ka kam, namar la sakhi ba kiba bun ki samla jong ka dong ka thaiñ ki ju mlien bha ha kane ka kam, kumta da ka jingïa-sngewthuh jingmut ryngkat ka jing-i-donkam ban leh ïa kata mynta ka sngi ka 7 tarik u Kyllalyngkot, 2023 la ïoh ban plie ïa ki ar tylli ki mawnongrim ïa kaba nangne shakhmat ynsa ïoh ban pyntrei noh.
Namarkata, u la kyntu ïa ka Kur Lyngkhoi paidbah nongshong shnong, ki samla ba haba ki ïoh ïa kum kine ki lad jingïarap kim dei ban pynleh noh ei hynrei ki dei ban pyndonkam hok ïa ki khnang ba kin long ki jingïarap ym tang ha kane ka pateng kaba mynta hynrei wat ha ka pateng ka ban sa wan ruh. “Ban wanrah ïa ka roi ka par kam shong eh ha u nongmihkhmat marwei hynrei ka donkam eh ïa ka jingïatreilang na baroh ki liang khnang ba ki jingthmu kin urlong”, ong u bah Pius.
Katba ha ka jingkren jong u bah Khranglin Lyngkhoi, Manager jong ka Kur Lyngkhoi pat u la pynkynmaw ïa ka jingïaid lynti naduh ba sdang ban tih ïa ka madan Mawkyn-deng namar ym tang ba na kane ka madan kin ïoh jingmyntoi tang ki katto katne ki briew hynrei baroh ki khun ki hajar, ki samla, ki hep kiba rit bad kham kyrpang ki samla kiba don ka sap ha ki kam ïalehkai bapher bapher. “Ngin ïaid ha kane ka pyrthei ym kum ki briew ki bym stad, hynrei ki briew kiba stad”, kyntu u bah Khrang.
Kiwei pat kiba la ai jingkren ha kane ka sngi ki long u bah Emeral Langte, u bah Thanbor, u bah Cornilius Nongbri, Working President ka UDP Ranikor Circle, u bah C. Syiemlieh na ka ophis u BDO Ranikor C&RD Block, u bah Alfon Kharryja bad na u Myntri Shnong Nongnah Nongkdiat-Nongtwah, u bah Iktiar Langte.
Ïa ka jingïalang la pynïaid da u bah Mulding Kharbani bad ka jingkren khublei na u bah Bikromlin Lyngkhoi, Chairman ka Sur u Paidbah jong ka thaiñ Nongnah.