Khliehriat, Nailar, 02: U Executive Engineer jong ka ophis PWD Khliehriat u Bah M. Kharnaior ha ryngkat ka jingsynran lang jong u Waheh Shnong ka shnong Sutnga u Bah Eban Sutnga bad Assistant Waheh Shnong na Jalaphet Bri Sutnga u Bah Moin Dkhar ha ka sngi Balang ki la hiar jurip ïa ka surok kaba la sniew bad buh jingma ïa ki paidbah ha ka leit ka wan.
Ha kane ka jingjurip, la synlang da ki dkhot jong ka Jaiñtia National Council (JNC) Jalaphet Unit hapoh ka jingïalam jong u Vice President u samla Phrangsngi Chyrmang.
Kane ka surok kaba don hajan ka jingkieng Syrbang kaba hap hapoh ka Elaka Sutnga kumba ka long mynta ka dap da ka khyndew ktieh kaba hap halor bad ki don ruh ki maw kiba heh harud ka surok kiba lah ban hap ha surok ha kano kano ka por.
Kum ban shu pynkynmaw ba ha kine ki sngi ba la leit noh, ka JNC ka la aiti da ka jingthoh da kaba kyrpad ïa ka ophis PWD, Khliehria ban leit jurip noh kloi ïa kane ka surok khnang ba ka tnat PWD ruh kan wad kloi ruh ïa ki lad ki lynti ban pynkhuid noh ïa ka khyndew ktieh ban lait na kano kano ka jingajia ba sngewsih.
Na ka liang jong u Executive Eeginner ka ophis PWD Khliehriat, u la kular ban shimkhia ïa kane ka kam kat kaba lah ban leh bad hadien nangta yn phah ruh ïa ki nongtrei ban pynkhuid ïa ka khyndew ktieh khnang ban pynsuk ïa ki paidbah ha ka leit ka wan.
