Wat kynnoh ïa ki party, ong u Myntri halor ka jingthombor ki paidbah dang shen ha Tura

Shillong, Nailar 02 : U Myntri ka sorkar jylla ba dei ruh u heh BJP ha Meghalaya, Bah AL Hek ha ka sngi Balang u la ong ba ym dei satia ban shu kynnoh ïa ki sengsaiñpyrthei halor ka jingthombor ki paidbah ïa ka ophis u Myntri Rangbah ha ka 24tarik u Naitung mynta u snem.
“Ym ju dei ban shu kynnoh ïa kino kino ki sengsaiñ pyrthei lane ki kynhun namar ki riewshim kabu ki don lut haei haei ruh,” ong u Bah AL Hek haba kren bad ki lad pathai khubor.
Katei ka jingkren jong u kadei halor ka thup kyrteng jong ki paidbah kiba shah kem kiba la pynpaw ba bun na ki, kidei kiba don jingïadei bad ki party bapher bapher khamtam eh na ka BJP bad TMC.
Palat 47 ngut ki paidbah ki la shah kem halor ka jingsuba ba ki donkti ha katei ka jingthombor ha katei ka janmiet kaba ki pulit ki kam ba kadei kaba la thmu ban buh jingma ïa ka jingim jong u Myntri Rangbah.
“Phi lah ban kynnoh ïa u Bah AL Hek hynrei ymdei ïa ka BJP tang namar ba nga dei na ka BJP. Lada u Bah AL Hek u leh kaei kaei kaba bakla phi dei ban kynnoh ïa u Bah AL Hek. Balei ban kynnoh ïa ka BJP? Ngam pdiang ïa kane ka jingpynïasnoh,” la bynrap biang utei u heh BJP.
Shuh shuh u la ong ruh ba katei ka jingjïa kam dei satia kaba don jingïadei bad ka sainpyrthei kumba la kynnoh namar ka party ka khlem phah ïa ki. “Hato ka Mamata Banerjee jong TMC ka phah ïa ki ban leh ïa kine kiei kiei lane ka u JP Nadda jong ka BJP uba phah ïa ki. Mano ba phah ïa ki, balei la shu kynnoh ïa ka party,” la bynrap shuh shuh u Bah Hek.
Nalorkata, u ong ruh ba kito kiba shah kem ki dei beit halor ka jingleh jong ki hi. Shuh shuh u ong ruh ba ki pdiang sngewbha ban thung da ka kynhun tohkit kaba laitluid halor katei ka jingjia khnang ban lap bad sei lut ïa ki jingshisha baroh.
U ong ruh ba ka tnad Kampohiing ka dei ban peit bniah halor ka shongsuk shongsain ha ka jylla da kaba kdew ruh ba dang shen ka iing jong ka Myntri Sorkar ka jylal ruh ka la shah thombor ha nongbah Shillong.