Shillong, Ïaïong 05: U Myntri ka tnat Textiles ka sorkar jylla u Bah Paul Lyngdoh ha ka sngi Thohdieng u la ong ba ka sorkar jylla ka dang don ha ka lynti ban jied bun ki shnong kum ki “hubs” na ka bynta ka Meghalaya’s textiles khnang ban kyntiew ïa kane ka karkhana sha ki kyrdan kiba kham shajrong.
“Ha ka jingshisha ngi la don mynta ha ka lynti ban jied ne ting ïa kiba bun ki shnong kum ki hub na ka bynta ka Meghalaya textiles bad ka sorkar ka la pynbna ruh ïa kiba bun ki sienjam ban kyrshan ïa ki nongthaiñ jaiñ la ki dei ki riew shimet ne ki society. Dei halor kane ba ngi la puyrshang ban kyntiew kham shalor ïa kane ka karkhana,” ïathuh u Bah Lyngdoh sha ki lad pathai khubor.
Haba ong ba ka jingïoh GI tag ba dang shen ïa ki jaiñ Ryndia ka jylla ka long kaba kongsan, u Myntri u la ong, “Kane ka long kaba bha bad ka khubor kaba dei ban pdiang sngewbha da ki nongthaiñ jaiñ bad ki artisan bad na ka bynta jong baroh kawei ka tnat bad ka sorkar Meghalaya ba hadien 4 snem ka jingïai pyrshang kaba khlem shongthait ba ka tnat textile bad kumjuh ka jingkyrshan kaba wan na ki seng ki nongthaiñ jaiñ, ngi la lah ban ïoh ïa ka GI tag na ka bynta ki jaiñ Ryndia. Kane ka long ka jingïaid lynti kaba pynthikna ba ka ïew ka hat na ka bynta jong ki kan kiew bad kane ka dei ka jingjop kaba khraw bha ïa ka Meghalaya textile industry.”
Haba kylli u Bah Lyngdoh u la ong, “Kane ka khana shuh shuh kan sa kylla shen namar ngin sa plie ïa ka textile hub, kaba yn don ha Nongpoh bad hapoh jong kane ka hub, bad kan sa don ka jingkiew halor kine ki kam na ka bynta ki nongthaiñ jaiñ ba kin lah ban pyni ïa la ki jong ki jingtrei bad ki tiar ba ki pynmih bad na ka bynta kiba wan thied ba kin ïoh ïa ki kam ba la leh, naduh ka jingai rong bad kiwei kiwei ki ban pyni hapoh ka hub.”
“Nalor kane, kin don ruh ki kyrteng kiba heh hapoh kane ka karkhana thaiñ jaiñ kiba lah ban wan kynduh ïa ngi bad kiba kwah ban ïatreilang bad ngi,” u la bynrap.
