Nongpoh, Rymphang 14: Ki nongïalam ka Byrnihat Sports Association (BSA) mynta ka sngi kila leit ban jurip ïaka madan ïalehkai bala tei pynbha ha ka shnong Lumnongrim, Byrnihat namar ka jingduh ïalehkai jong ki khynnah mynta la bun bnai naduh ba ki kam kala ïaid shaid shaid ban tei pynbha ïa katei ka madan naduh ki stadium, ki kynroh bad kiwei kiwei.
Kum ban shu pynpaw ba ïa katei ka madan la buh mawnongrim ha u bnai Lber 2022 ban tei ïaka stadium ba paka da u Bah Banteidor Lyngdoh ba bat ruh kum u Myntri ka tnad ïalehkai ha katei ka por, bala mang pisa ruh haduh 5.7 klur lyngba ka State Sports Council da ka jingangnud ban kyntiew ïaka kam ïalehkai sports ha katei ka thaiñ bad ka dei ruh kawei naki jingpynmang ba heh tam naka bynta ki madan ïalehkai ha Ri-Bhoi District.
U Bah Wanphrang Lyngdoh, General Secretary ka BSA u la pynpaw ba kane ka stadium ka long shisha ka jingkyrkhu ïaki samla ha katei ka thaiñ lyngba ka jingshimkhia jong u MLA u Bah Sosthenes Sohtun ba dei ruh u President ka BSA, bad khamtam ka jingkiew ki kam ïalehkai hakatei ka thaiñ naduh ba u la shimti kum u President bad ka jingangnud, ka jingphohsniew jong ngi da ki phew phew snem kala urlong mynta ka kynti.
U la ïathuh ruh kumba long haduh mynta ka kam kala ïaid kumba 80%, bad khmih lynti ruh ba u kontraktor un shimkhia ban pyndep ïakatei ka kam haka por bala buh namar ki samla ïalehkai kila lynga pisa namar kim ioh shuh ban lehkai bad ban pynlong ïaki tournament bapher bapher.
U la ai khublei ruh ïaka sorkar MDA hapoh ka jingïalam u Conrad K Sangma ba ka thaiñ Byrnihat ka dei shisha kaba donbok ban ioh ïaka madan ïalehkai kaba paka ba don naduh ki jaka shong paidbah bad kiwei kiwei ki jingdonkam ki samla ïalehkai.
Haba ioh ruh ban ïakren bad uwei naki samla ïalehkai katei ka thaiñ u la ong ba kane ka jingïaid shaid shaid jong ka kam ban pyndep ïaka Stadium ka long shisha ka jingkyrkhu ïaki samla katei ka thaiñ lyngba ka jingshimkhia jong u MLA ba dei ruh u President ka BSA bad kum ki samla kiba ju leit ban kilan ha katei ka madan kila angnud ba yn pyndep noh khamkloi ïa katei ka madan ba kum ki samla kila angnud ban bteng biang ïaki kam ïalehkai khamtam ban pynlong ïaki tournament bapher bapher.
