Aïu kan jia lada ka sorkar kam pynhun ïa kiba dawa Block ophis ha Nonglang bad Tynghor

Nongstoiñ Nailur 15: Ka jingthmu jong ka sorkar ban pynkynriah ïa ka Block ophis jong ka Rimuliang C&RD Block na ka shnong Nonglang sha ka shnong Tynghor ka la pynkhihwin ïa ki paitbah bun phew tylli ki shnong kiba hap hapoh katei ka Block kat haduh ba ki riew rangbah jong ki shnong kiba kwah ba ka Block ophis kan don ha shnong Nonglang ki la thaw da ka Joint Action Committee Rimuliang C&RD Block na ka bynta ban ïeng pyrshah ïa ka sorkar lada ka pynkynriah ïa katei ka Block ophis na ka shnong Nonglang.
Halor ka jingthmu jong ka sorkar ban pynkynriah noh ïa katei ka Block ophis na shnong Nonglang sha shnong Tynghor ka la mih ka jingpyrshah kaba jur na ki ym tang na ki nongïalam bad ki dkhot jong ka Joint Action Committee hynrei ka jingpyrshah kaba kham jur ka dei na ki paitbah nongshong shnong ha kab la ïohi ha ki artylli ki jingïaid rally bad rah da ki lama ïong kaba la sdang ha shnong Nonglang ha ka 13 tarik jong u bnai jylliew ba la dep ha kaba da ki hajar ki paitbah ba la kyrshan lang ruh da ki sengbhalang kiba trei kam ha katei ka thaiñ kum ka KSU bad FKJGP ki la mih ban ïashim bynta bad ai jingkren ruh ha ka jingïalang.
Nalor kata katei ka jingpyrshah jong ka Joint Action Committee bad ki paitbah ka la nangkham jur shuh shuh bad kam shym la kut tang ha shnong Nonglang hynrei dang ha ka 9 tarik mynta u bnai ki nongïalam ka Joint Action Committee ki la lum biang ïa ki paitbah bad tur syndon puk haduh ka ophis jong ka Deputy Commissioner ha Nongstoiñ ban pynsngew ha ka ba kin ym ailad da lei lei ba ka sorkar kan pynkynriah ïa ka block ophis na ka shnong Nonglang ha kaba ka Smt Hemanayak IAS Deputy Commssioner ka West Khasi hills ka la hap ban khot ïa kamra trei kam jongka ban ïakren sngewthuh jingmut bad ban pynsgewthuh ba kim dei ban pynmih kino kin jingeh kiba lah ban ktah ïa ka shong suk shong saiñ.
Ha kaba ïadei bad katei ka wan tur jong ka Joint Action Committee Rimuliang C&RD Block ha ophis jong ka Deputy Commssioner ha ka jingbuddien jong u nongthohkhubor jong u Mawphor la lap ba hadien katei ka jingkhot ïakren jong ka Deputy Commssioner na ka liang ki nongïalam jong ka JAC bad ki paitbah ki la kohnguh tangba kim pat hun satia katba ka sorkar kam pat pyni da ki kam pat pynthikna bad jubab da ka jingthoh ba ïa katei ka Block ophis yn pynneh ha shnogn Nonglang ne yn pynkynriah sha ka shnong Tynghor. Haba ïakren bad ki nongïalam jong ka JAC Rimuliang C&RD Block ki la ong ba ki ladep pynsngew ha ka Deputy Commissioner ïa ki mat jingdawa bad pynshai ruh halor ki jingeh ki ban mih lada ka sorkar kam suitñiew ïa ka jingdawa jong ki. Ha kajuh ka por ki nongïalam ka JAC ki la ong ba ka sorkar kam dei ban pynslem ha ka ban ai ka jingpynshai halor katei ka jingdawa namar lada kan pynslem na ka liang ki nongïalam ka JAC kin ym lah ban teh lakam ïa ki paitbah haba ki la bitar palat bad ym don jingartatien ruh ba bun ki jingeh ki ban ktah ïa ka shongsuk shong saiñ hapdeng ki paitbah shnong kiba kwah ban pynneh ïa ka Block ophis ha ka shnong Nonglang bad kiba kwah ban rah sha shnong Tynghor.
Ki la ong ruh ba na ka liang ki paidbah ki la dep kren shai ba nlada kino kino ki jingeh kiba ktah ïa ka shongsuk shongsaiñ ha katei ka thaiñ kan mih kin ym kitkhlieh satia hynrei ka sorkar ka dei ban shim ïa ka jingkitkhlieh. Shuh shuh ki la ong ba ki paitbah ki la kynnnoh tyngeh ba u MLA bad MDC ka Rambrai Jyrngam constituency u Sirdar ka hima Jyrngam ki dei kiba la don kti ha katei ka kam ban dawa pynkynriah ïa ka Block ophis na Nonglang sha Tynghor.
Nalor kata la ïoh jingtip ruh ba na ka liang ki nongïalam jong ka kynhun kaba dawa pynkynriah ïa ka Block ophis na Nonglang ki la leit ban ïakynduh ïa u Myntri Rangbah bad Symbud Myntri Rangbah ka jylla ban pynbor ïa ki ba kim dei ban sngap ïa ka jingdawa jong ka JAC hynrei haduh ba thoh ïa kane ka khubor ym shym pat la ïoh jingtip satia kaei ka jubab ba u Myntri Rangbah bad Symbud Myntri Rangbah ka jylla ki kular ha ki.