“Ai ki nong Assam kin kamai sahuh ha Assam, ngi ruh ngin kamai tang ha Meghalaya” ong ki nongñiah kali

Nongpoh, Nailar 21: Namar ka jingïakhang mar kylliang ïaki kali ba kiew sha Meghalaya bad kumjuh ruh kiba hiar sha Assam ka surok Ri Bhoi mynta ka sngi kala kynjah bad kylluid war.
Ka jingïakhih jong ki nongñiah kali kamai ka jylla Assam hapoh ka lama ka Assam State Taxi Driver ka dang bteng mynta ka sngi ha kaba la khang pyrshah ïa baroh ki kali na Meghalaya ban hiar sha Assam ha Jorabat bad kum ka jubab bad kput ïaka jingleh jong ki nongñiah kali kamai na Assam, ka All Khasi Meghalaya Tourist Taxi Association kila bat lang ïaki kali Assam ban kiew sha ka jylla kum ka jubab ba mar kylliang ïaka jingleh jong ki ha Byrnihat bad kumjuh ruh ha lad Umroi.
Ïa kane ka jingïakhih jong ka AKMTTA la wan ruh ban snohkti lang da ki nongñiah kali bym dei khasi kiba ju kamai ha nongbah Shillong bad kiwei kiwei ki bynta ka jylla ban kyrshan ïaka AKMTTA bad ruh ban pyrshah ïaka jingkhang kali kamai ka Assam ka bym don nongrim haei ruh namar la kynnoh ba dei maki kiba la sdang ban khang nyngkong.
Katto katne ki nongñiah kali kila ong ba kane baroh ka dei ka jingsdang jong ka Assam kaba la khanglad ïaki kali Meghalaya ban rung sha Assam bad dei halor katei ka nongrim kum ki nongñiah kali kila shim ïaka juh ka sienjam ban khanglad ïaki kali Assam ban rung sha ka jylla.
Kila ong ruh ba kum ki kali kamai kiba kamai ha Meghalaya ki kmen eh ban pynneh syndon ba ki kali na Assam kin kut ka jingkamai tang ha Jorabat bad ruh ki kali Meghalaya ha katei ka juh ka jaka kaba mut ki kali kamai na Assam kin nym dei shuh ban rung sha Meghalaya bad ki kali Meghalaya kim dei shuh ban rung sha Assam.
Haba kren sha ki nongthoh khubor u Bah Ricaldinus Dohling President ka AKMTTA bad u Antholius B Marak President ka All Shillong Tourist Taxi Association kila ong ba ka jingjia kaba la jia haka 19 tarik ha Nongbah Shillong kadei kaba hap ban pynrem, hynrei ym dei pat ban khang iaki kali kamai bad ki kali paidbah ban rung ban mih naka jylla Meghalaya bad Assam bad dei ka Assam kaba la sdang nyngkong ban khang syndon ïaki kali ha Jorabat, bad ka bha syndon ai ba ki kali Assam kin kamai sha Assam bad ki kali Meghalaya kin kamai ha kane ka jylla ban pynkut syndon iaka jingkamai ha khappud namar kumba la iohi dei ki kali Assam suda kiba la wan ban kamai sahuh sha ka jylla.
“Ngin ym pyndem ïa kane ka jingïakhih kumba ki nongñiah kali na Assam kila sdang bad ngin leh lang kumjuh watla dei ban shah kem ruh ngi la long kiba la pynkhreh” la ong kitei ki nongïalam.
U Antholius B. Marak, President ka All Shillong Tourist Taxi Association, u la pynpaw ïa ka jingbitar bad jingpynrem halor ka jing leh ki nong Assam ban bat bad pynjulor ïa ki kali Tourist na Meghalaya ha Jorabat, bad ka jingpynhiar kput da ki nong Assam da kaba bat bad pynjulor ïa ki kali Meghalaya ha Jorabat ka dei ka kam kaba ym lah ban pdiang, namar kila don palat 15 tylli ki kali na Meghalaya kiba la shah pynjulor, hynrei ki Association na Meghalaya kim shym la leh eiei pyrshah ïa ki kali kamai ka Assam, bad kin nym pyndem da lei lei ruh ha kane ka kynti.