Ai khublei ki 3 seng ïa ka sorkar MDA bad u MLA halor ki skhim pynroi ha Jirang Constituency

Nongpoh, Naiwieng 15: Ki 3 tylli ki kynhun sengbhalang ba kynthup naduh ka KSU, FKJGP bad RBYF jong ka thaiñ Western Ri-Bhoi kila ai ka jingkhublei ba kyrpang ïaka sorkar MDA bad kumjuh ruh ïa u MLA ka Jirang Constiteuncy u Bah Sosthenes Sohtun halor jingwanrah ïaki kam pynroi ha katei ka constituency kaba ki paidbah naduh ki por ba mynshuwa kim pat ju ioh mad.
Haba kren bad u nongthoh khubor naka liang u Bah Center Doloi President ka FKJGP Western Ri-Bhoi u la ong ba hadien ba ka Jirang Constituency kala ioh pdiang shibun ki kam pynroi naduh ka jingshimti jong u Bah Sosthenes Sohtun kum u MLA, kum ki kynhun sengbhalang kila lum ka jingïalang khlem da lah ban pynpaw ka jingsngewnguh ïaka sorkar MDA khamtam ïa u Bah Sosthenes Sohtun u ba la shimkhia ban leit tynruh ban wanrah shibun ki skhim pynroi ha katei ka thaiñ.
“Kumba long haduh mynta ka Jirang Constituency kala ioh shibun ki kam pynroi kiba kum ki paidbah kila angnud mynta da ki phew snem naduh u surok ba kongsan tam na Umling-Patharkhmah, Umsen, ka Model Degree College, bad khamtam ka jingpdiang ka sorkar ban wanrah noh ïaka Civil Sub Division ha Patharkhmah kaba dei ka jingkmen kaba khraw tam ïaki paidbah jong ka Jirang Constituency, nalor kiwei kiwei ki kam pynroi” la ong u Bah C Doloi.
U la ong ruh ba naduh ki por ba mynshuwa ka Jirang constituency kadei kawei naki constituency kaba la heh bad kaba ju shah iehbeiñ ha Ri-Bhoi watla kala ioh shibun ki nongmihkhmat, hynrei dei ha kane ka kynti ba mynta ba la iohi ïaka jingkylla dur jong ka constituency naka jingshimkhia jong u MLA bad ka sorkar MDA ban sngap ïaka jingeh jong ki paidbah.
Kumta naka liang kitei ki 3 seng ki ai ka jingkhublei ba kyrpang ïaka sorkar MDA bad kumjuh ruh ïa u Bah Sosthenes Sohtun halor ki skhim bapher bapher bala wanrah ha Jirang Constituency naka bynta ka jingbit jingbiang jong ki paidbah, u la bynrap.