Ai khublei ka FKJGP-EJHD ïa ka tnat pulit kaba la kem bad thang ïa ki drok

Khliehriat, Naiwieng 14: Ka Federation of Khasi Jaiñtia and Garo People East Jaiñtia Hills District ka ai ka jingkhublei ïa ka tnat pulit jong ka East Jaiñtia Hills District bad baroh ki pulit jong ka jylla Meghalaya kiba la treishitom bad ïakhun tyngeh ban pynduh pyndam ïa u drok bad haduh mynta ki dang don hapdeng ka jing iakhun pyrshah ïa u drok, ka seng ka ai khublei ruh ïa ka tnat pulit ba ka la lah ban thang ïa ki drok kiba shongdor haduh T 4 klur tyngka myn ha ka 9 tarik mynta u bnai ha ka ding ba rhem ba sain dewbilat ha Star Cement Company Lumshnong kaba long lyngba ka hukum jong ka iïngbishar.
Na ka liang u General Secretary FKJGP East Jaiñtia Hills District, u bah D. Sumer, u la ong ba “Kum ka seng ngi long la kloi ban ai ka jingiatreilang bad ki bor pulit ha kano kano ka por, ban rat dyngkhong ïa u drok bad ban wanrah pat ïa ka imlang ka sahlang kaba lait na u drok, shisha u drok u dei u nongshun ba shyrkhei uba wan ban hiar thma jar jar ïa ka ri bad ka jaitbynriew ban pynbakla noh ïa ka jingmut jingpyrkhat jong ki khun samla ka ri, kumjuh ruh u drok pyntroiñ ym tang ïa uba dih ne pyndonkam ïa u hynrei u pyntroiñ wat ïa ka lawei ka ri bad pynlong ïa ki khun samla kum kito ki bym don shuh ka lawei”
Utei u nongialam ka FKJGP na East Jaiñtia Hills District, u pynpaw ruh ka jingsngew khia halor ka jingjyllei ki kam sniew, ha ka tuh, ka lute, ka pyniap briew bad shibun ki kam sniew bad ong ba ki kam sniew ba bunjait bunsiem ki mih dei ruh na ka daw u drok, ka jingkynrei u drok ka wanrah ruh ïa ka jingbym shngaiñ shuh ha ka imlang ka sahlang, ka wanrah jingeh haduh katta katta bad ka long ka jingbam khia ïa kito ki longïing kiba shah ktah ha u drok, te kum ka seng kaba don ka jingkitkhlieh ïa ka bha ka miat ha ka imlang ka sahlang, ka khot bad wer ruh ïa ki paidbah baroh ban ai ka jingiatreilang bad ka tnat pulit ban dup lah ban rat dyngkhong ïa u drok kumba na ka liang ka seng ruh ka kloi ban iatreilang ban iakhun pyrshah ia u drok.