Shillong, Risaw 30 : Ka PRIME Meghalaya ha ryngkat ka jingïatreilang bad ka Bio-NEST NIPER Guwahati ka la sdang ïa ka jingthmu kaba thymmai ban pynshisha da ka saïan bad ban kyrshan ïa ki nongsumar tynrai ha kane ka jylla Meghalaya.
Ka jingthmu jong kane ka prokram ka thmu ban pynneh pynsah ïa ka pateng ba riewspah jong ka jylla ha ka rukom sumar tynrai da kaba pynïadei ïa ki bad ki kyndon saïan jong ka juk mynta bad ki lad seng kam seng jam na ka bynta ka jingroi kaba neh.
Kum shi bynta jong kane ka sienjam, la lum ïa ka jingtip ba bniah jong ki 769 ngut ki nongsumar tynrai ha kylleng ka jylla, bad la jied shwa tang ïa ki 143 ngut ki nongsumar tynrai na ka bynta ka kylla kaba bud jong ka prokram hadien ba la dep ka jingpynshisha kaba pyrkhing bha da ka jingïakren lyngba ka phone.
Ka jingpynshisha ka sdang shwa da ki lad jingsumar tynrai na ka bynta ki hynriew tylli ki jait jingpang ba kynthup naduh ka jingpang gastric, jingpang colic, malaria, acidity, gallstone, bad arthritis.
Ka bynta kaba kongsan ka dei da ka jingsoi ïa ka soskular Memorandum of Understanding (MoU) bad san ngut ki nongsumar tynrai kiba la shah jied ha ka kylla kaba nyngkong jong ka prokram.
Kine kiba shah jied ki kynthup ïa u Bah Richard Syiem, Bah Jop Pohtmi, Bah Teibor Lyngdoh, Minnerson C.H. Sangma bad Phidalyne Nongsiej.
Na ka liang u Ankur Adhikary, CEO jong ka Bio-NEST NIPER Guwahati, bad Dr. Bethsheba Basawïamoit, Incubation Manager, Ki la pynksan ba ka jingïatreilang ka thmu ban don ïa ka rynsan kaba la buh ryntih na ka bynta ka jingpynshisha jong ka science bad ka jingpynroi ïa ki kam ha ka liang ka jingsumar tynrai.
