Nongpoh, Risaw 31: Halor kawei na ka jingjia ba sngewsih kaba la jia ha kawei ka longïing ha Umkadhor kaba dei na ka jingbam duh ka ding ïa kawei ka ïing haduh ba ka la kylla dpei, ki riew don mynsiem ba kynthup naduh ki nongïalam ka NPYF, u kyrtong ka BJP bad ka FKJFP Western Zone ha Ri Bhoi ki la leit ban ai jingïarap sha katei ka longïing shi bynta ban tynrong lem ïa katei ka jingshem lanot katei ka longïing ha Umkadhor.
Kitei kiba la leit ban ai jingïarap ki kynthup naduh ka NPYF Jirang Constituency ha ka jingïalam u Remington Syngkli, uba dei u Secretary, ka seng FKJGP Western Zone ha ka jingïalam u President, u Bah Center Doloi bad kynthup u kyrtong ka BJP, u Bah Gee Bareh.
Na ka liang ka FKJGP bad ka NPYF ki la leit ban ai jingïarap da ki tiar ïing bad ka Tin Sopïing ba la ïarap da u MLA ka Jirang, u Bah Sosthenes Sohtun bad u kyrtong ka BJP, u Bah Gee Bareh pat u la ïarap ka song pisa.
Kum ban pynkynmaw, kane ka ïing kaba la shah bamduh ha ka ding ka dei ka ïing jong u Bah Shempor Syngkli, ha kaba kene ka jingjia ka la jia ha ka 23 tarik u Risaw, 2022, haduh ba katei ka longïing ka la duh ïa ka ïing ka sem da ka jingbam duh ka ding ba shyrkhei.
