Pyllait paidbah u President ka HFU ïa ka kyrteng ‘NML’ ne ka brand jong ki mar-rep ha Nongnam

Mawkyrwat, K’Lyngkot 28 : Ka long kaei kaei ka jingjop kaba khraw na ka bynta ki paidbah nongrep ha ki thaiñ war jong ka Area San Shnong Nongnam ha kaba ha kine ki khyndiat sngi ki la ïoh ban pyllait paidbah ïa ka kyrteng ‘NML’ ne ka brand na ka bynta ban ai kyrteng ïa ki mar jong ki ba kin sa ïoh ban pynïaid ïew ha kylleng ki jaka ne wat ban ai jingtip ha ki nongwan thied ïa ki mar napoh ka thaiñ Nongnam.
Lah ban ong ba kane ka ‘NML’ (brand) kan kdup na ka bynta ki san tylli ki shnong kata ka Shnong Nongnam, Mawbri, Mawkhyrwang, Mawtangden bad Lumpyngngad.
Kumta, da kane ka kyrteng ‘NML’ (brand) kaba dei ïa ki mar rep kum u sla tyrpad, u kwai, u tympew, ki kynja soh bad kiwei kiwei ki mar rep kiba pynmih na ka thaiñ Nongnam kaba hap hapoh ka South West Khasi Hills District, ki paidbah na kylleng ki jaka kin sa ïoh ban pyntip ba ki mar rep kiba don ïa ka kyrteng ‘NML’ ki long ki mar kiba bha.
Ha kane ka jingpyllait paidbah la donlang naduh u bah Commander Shangpliang uba dei u President ba rangbah jong ka Hill Farmers Union Central Body, ki nongkitkam jong ka Hill Farmers Union ha ka Area San Shnong Nongnam, ki riew rangbah bad ki Myntri Shnong.
U bah Commander Shangpliang uba dei u President ba rangbah jong ka Hill Farmers Union Central Body, haba kren ha ka jingïalang u la pynpaw ka jingaikhublei na ka bynta kane ka jingjop jong ki nongrep ha kane ka Area San Shnong Nongnam kaba ki poi mynta ban pyrkhat thymmai ha ka ban pynmih syndon da ka kyrteng ne ka brand kata ka ‘NML’ ha kaba lyngba kane ka kyrteng ki briew kiba kwah ban shim kabu kin nym lah shuh, namar da kaba ki buh da kane ka kyrteng, ki mar rep jong ki ruh kim long shuh kiba sniew hynrei ki la sei beit da u ba bha.
Kumta, u la ai ka jingkitbok kitrwiang na ka bynta ki nongrep ha kitei ki thaiñ ba kin nang ïaid shakhmat ban pynïaid shaphrang ïa ka kam rep ka riang kaba ban long ka jingmyntoi ïa ki hi ha ki por baroh. “Lada ki don kano kano ka jingeh ha ka liang ka rep ka riang, ka jingpynïaid ïew ïa ki mar rep jong ki, kim dei ban shu sngap hynrei ki dei ban ai jingtip ha ki nongkitkam jong ki unit ka HFU khnang ba yn lah ban ïa kren bad ïa pynbeit”, ai mynsiem u bah Commander Shangpliang.