SHILLONG, Kyllalyngkot 28: Ka All Meghalaya Karate Do-Association (AMKA) ka dap da ka jingsngew sarong ban pynbna ba ka kynhun ki nongïalehkai Karate kynthei bad shynrang, ki la wanrah nam bad burom ïa ka jylla da kaba khur 41 tylli ki takma ha ka 43rd JKA India National Programme, ha Maligaon, Assam.
Ka 43rd JKA India National Programme ka don lai tylli ki jingïakop kiba kynthup ïa ka ‘43rd JKA India National Karate Championship & Camp 2026’; nangta ka ‘13th JKA India Veteran Tournament 2026’; bad ka ‘18th JKA India Kyu Level Tournament 2026’, bad la pynlong ïa ka ha ka 16 tarik haduh 20 tarik u Kyllalyngkot, 2026 ha Maligaon, Assam.
Ka AMKA ka la sei ïa ka kynhun kaba don 68 (hynriew phew phra) ngut ki nongïalehkai Karate ban mihkhmat ïa ka jylla sha kane ka JKA India National Programme.
La synran ïa ka kynhun da u Bah Banshanlang Kharumnuid, Bah Donboklang Lyngdoh, bah Greater E. M. Kharpuri, Arjun Sewa, bad ka kong Sharai Nongneng Shanpru kum ki nongïalam. Ki 41 tylli ki takma ba ki nongïalehkai ki la ïoh khur ki kynthup ïa 11 tylli ki takma ksiar, 9 tylli ki rupa, bad 21 tylli ki takma rnong.
Nalor kata, kaba kham sngewtynnat ka long ba u Sensei Donboklang Lyngdoh u la pass bha ïa ka eksamin 6th Dan Black Belt, ba la pynïaid da u Shihan T. Taniyama, 7th Dan, uba dei u JKA Headquarters Instructor na Japan.
Ha kaba ïadei bad kane, na ka liang jong ka Association ka ai khublei kyrpang ïa baroh ki nongjop takma, ki official, bad u Sensei Donboklang Lyngdoh na ka bynta ki kam kiba dei ban ïaroh.
