Jop ka MGHSS bad ka Ryngkat Ryngkat SHG, Jakrem ha ki jingïakop rakhe ïa ka NVD

Mawkyrwat, K’ Lyngkot 23: Kum shibynta jong ka jingrakhe ïa ka 16th National Voters Day (NVD) 2026, ka ophis jong u Deputy Commissioner ka South West Khasi Hills District (Election) ula pynlong da ka jingïakop ïa kynthip jong ki khynnah skul ne ka Inter-School Quiz Competition bad ka jingïakop thoh slogan kaba ka phang ka dei, “My India, My Vote – Citizen at the Heart of Indian Democracy”, ba la pynlong hapoh ka Multipurpose Hall DC Office, Laitlawsang, South West Khasi Hills District.
Ha kane ka sngi, la donlang u Bah F.B. Basan, MCS, Additional Deputy Commissioner (EL), South West Khasi Hills District kum u kongsan, u Bah I. Lawrniang, MCS, Assistant Commissioner, South West Khasi Hills District uba la shim ïa ka bynta ban phah pule ïa ka pledge da kaba la ïashimbynta lang baroh kiba la don ha ka jingïalang naduh ki khynnah, ki nonghikai, ki SHGs lem bad ki riew rangbah.
U Bah F.B. Basan, MCS, Additional Deputy Commissioner (EL), South West Khasi Hills District haba kren ha kane ka sngi, u la pynkynmaw ïa ka jingkordor jong kane ka jingrakhe ïa kane ka National Voters Day. Kumta lyngba kane, ka ai mynsiem ïa ki paidbah nongshong shnong kiba ka kynjoh ïa ka 18 snem shaneng ba ki la don ïa ka hok ban ïa shimbynta ban jied ïa ki nongmihkhmat bad ym tang kata, da ka jingdon ïa kane ka EPIC ki lah ruh ban pynkhlaiñ ïa ka jingsynshar paidbah ne Democracy.
Namarkata, ula kyntu ïa ki paidbah ba haba ki la don la ki jong ki EPIC ne ki dur thep vote kim dei ban pynleh noh ei hynrei ki dei ban mih shakhmat ban ïashimbynta da kaba pyndonkam hok ïa la ka hok jong ki la ha kano kano ka bynta. Haba kren ai mynsiem na ka bynta ki khynnah skul, u la pynpaw ka jingai khublei na ka bynta jong ba lyngba ka jingmih shakhmat jong ki ha kum kine ki program kin nang ai jingtip ïa ki na ka bynta ka jingmyntoi ïa ka la shai la shi-sngi.
Hadien ka jingkren, la ïoh ban sam ïa ki khusnam ïa ki nongjop ha ka Inter – School Quiz Competition la wan ïa shimbynta da ki 5 tylli ki skul kata ka Maharam Government Higher Secondary School, Mawkyrwat kaba wan ha ka kyrdan ba nyngkong, ka Little Star Higher Secondary School, Mawkyrwat ha ka kyrdan ba ar bad ka Mawkyrwat Presbyterian Secondary School, Laitlawsang ha ka kyrdan ba lai. Nangta, ha ka Slogan la jop da ka Ryngkat Ryngkat SHGs, Jakrem, ka Meiphih SHG, Mawlangwir ha ka kyrdan ba ar, bad ka Persara SHG, Mawlangwir ha ka kyrdan ba lai.
Ha kane ka sngi la donlang ki program kyrpang ba la ai da ka Lapdiang Nongsiej bad na u Wankupar Lyndoh kiba dei ki SVEEP Partner.
Ïa ka jingïalang la pynïaid da u Bah C. Kassar, MCS, Assistant Commissioner (EL), South West Khasi Hills District bad ka jingkren khublei na u Bah I. Diengdoh, ASE, Election Branch, Mawkyrwat.