Shillong, K’Lyngkot 23: Ka Meghalaya Board of School Education (MBOSE) ka la thaw ïa ka Academic Committee kaba thymmai na ka bynta lai snem, da ka jingthmuban pynkhlain ïa ka pule puthi, ka jingpeit bniah ïa ki curriculum badka rai ha kaba iadei bad ki eksamin ha ka jylla.
Katkum ka jingpynbna paidbah kaba la pynmih da ka MBOSE headquarters na Tura, ïa kane ka committee lathaw hapoh ka kyndon 21 (1) jong ka Meghalaya Board of School Education (Amendment) Act, 2006.
U Executive Chairman ka MBOSE un bat kum u Chairman jong ka Academic Committee, katba kiwei ki heh ophisar ba kynthup ïa u Directors of Higher & Technical Education, School Education & Literacy, bad u Educational Research & Training – la shah kynthup ban long kum ki members.
Ka Committee ka wanrah lang ruh ïa ki stad pule puthi bad ki khlieh pyniaid jong ki jaka pule na kylleng ka Meghalaya kynthup ki nongmih khmat na NEHU, NERIE, ki College Sorkar, ki jaka pule ki Nonghikai bad ki Higher Secondary School ha Tura, Shillong, Jowai, Dalu bad Nongpoh.
U Controller of Examinations ka MBOSE Tura u dei napdeng ki dkhot, katba ïa u Chief Academic Officer ka MBOSE la thung kum u Member Secretary.
