Mawkyrwat, K’Lyngkot 18 : Ki hajar ngut ki longkmie na kylleng ki jaka ki la tuid lang ha ka jingïalang jong ka XX Annual Convention jong ka Commission for Women Nongstoin Diocese ba la pynlong mynta ka Sngi U Blei ka 18 tarik u Kyllalyngkot, 2026 halor ka phang, “To Kyrmen da ka jingkmen, to ïai shah ha ka jynjar to minot ban duwai”, ha madan jong ka Nativity of our Lord, Parish Mawkyrwat.
Ïa kane ka sngi ba khraw jong ki Longkmie la dang da ka Mass bakhuid ha kaba u Most Rev. Bishop Wilbert Marweiñ DD, uba dei u Bishop jong ka Nongstoin Diocese u la long u nongkñia Rangbah, ha ka jingdonlang ki Lyngdoh na ki Parish bapher bapher.
Haba pharia lyngba ka jingkren ïa ka Ktien U Blei U, u Most Rev. Bishop Wilbert Marweiñ ula pynkynmaw ha ki longkmie shaphang kawei ka Longkmie kaba don 7 ngut ki khun kaba la shitom jur bad hadien kata ka la dkut mynsiem bad katba kiba ha ïing ha sem ki dang mut ban pynsum kawei ka kjat ka dang syaid bad kim shym la pynsum shuh ki la ap shuwa, kane ka Longkmie ha kata ka jingïaid lynti ka jong ka, ka la poi sha kawei ka jaka ha kaba uta u nongap um shah ïa ka ban rung, u la phah ïa la ban leit phai noh na ka lynti kaba ki wan.
Ym tangkata, u la ïathuh ruh ba hadien ba ka la wan phai biang bad kyndit bynriew, ka da kylli balei ba ïa bun briew, bad haba la ïathuh ïa kaei kaba jia baroh, kane ka Longkmie ka la ïathuh khana halor ka jingïaid lynti jong ka baroh ha ka por ba don hapdeng jong ka jingïohthiah. Kumta, u Bishop u la kyntu ïa ki paid riewngeit kiba la wan lum lang ha kane ka lympung ba ki dei ban kynmaw ha ka jingïaid lynti, teng teng ki ïaid ha ka jingdum bad haba ki ïaid shakhmat ki poi sha la jingshai.
Kumta, dei lyngba ka jingshai kaba wanrah ïa ka jingim kaba phuh mut phuh mat, kum ki longkmie ki la ïohi ïa ka jingkylla ha la por ba ki dang samla bad ha kane ka por ba ki la longkmie. U ong shuh shuh ba ki ïohi ïa ka jingkylla ha la ka jong ka jong ka jingïohi bad ka jingïohi ka ïa pher iwei na iwei pat. “Haba ngi phai dien, ngi ïohi ïa ki jingbha, ki jingsniew bad ki jingïakynduh bapher bapher,” ula ong.
Namarkata, u ong haba ki ïohi ïa ka pyrthei kaba kmen, ka pyrthei kaba don ha ki jingïaleh bad U Blei Un btin lynti. U la pynkut ïa ka jingkren da ki kyntien jong ka jingkitbok kitrwiang ïa ki longkmie ba kin lah ban trei bha shuh shuh ha kine ki sngi ban wan.
Ha kane ka sngi la pynkup burom ïa u Bishop u Most Rev. Bishop Wilbert Marweiñ, u Spiritual Director, u Fr. Silvester Nongsiej, ki phadar baroh kiba ïa shimbynta, ki Nongïalam barim ka Commission kiba la trei shitom bad kumjuh ruh ia ki Nongïalam ka Seng Longkmie ka Diocese bad kumjuh ruh ka jingsam ruh ïa ki khusnam sha ki nongjop.
Ban pynkut ïa kane ka jingïakynduhlang jong ki Longkmie kaba dei ka XX Annual Convention jong ka Commission for Women Nongstoin Diocese la pynhiar noh ïa ka lama jong ka synjuk bad la aiti ïa ka sha ka Parish ka ban sa pynlong ha u snem ban wan, kata sha ki Nongïalam ka Seng Longkmie ka Parish Nongjri.
