Ha ka sngi kynjoh 3 snem ka Civil Hospital Mawkyrwat, plie u bah Renikton ïa ka OT ba thymmai

Mawkyrwat, Kyllalyngkot 16: Wat hapdeng ki jingeh kiba bun ha ka jingiaid lynti jong ka jaka sumar ha Mawkyrwat ka Civil Hospital Mawkyrwat, South West Khasi Hills District ha kaba mynta ka sngi ka la kynjoh ïa u mawmer ba lai snem jong ka jingplie paidbah ïa ka jingtei jong ka jaka sumar ba 100 jingthiah.
Lah ban kdew ba ha kajuh hi ka sngi kum ka dak jong ka jingkmen ba ka kynjoh 3 snem u bah Renikton Lyngdoh Tongkhar uba dei u MLA ka Mawkyrwat Constituency kum u kongsan u la ïoh ban plie paidbah ïa ka Operation Theatre (OT) kaba dei ka kam puit nongpang ba thymmai. Ym tangkata, ha kajuh hi ka sngi u la ïoh ruh ka lad ban leit jngoh ïa kiba thiah pang ryngkat ki kyntien ai mynsiem.
Haba kren ha ka jingïalang, u bah Renikton Lyngdoh Tongkhar uba dei u MLA ka Mawkyrwat Constituency u la ai ka jingïaroh ïa baroh kiba la ïa don byntalang ban pynurlong ïa ka jaka sumar ba 100 jingthiah ka Civil Hospital Mawkyrwat kaba la kham bit khambiang ban ïa nujor bad kiwei de ki jaka sumar hapoh ka jylla.
U la pynkynmaw ruh ba ka jingurlong jong kane ka 100 jingthiah ruh ka dei lyngba ka jingprad lynti jong uwei na ki riew rangbah ka dong ka thaiñ, u (L) Rowell Lyngdoh uba dei u MLA ba rim jong ka Mawkyrwat Constituency ha kaba dei lyngba jong u ba kane ka jaka sumar kan don hapoh ka Mawkyrwat.
Shuh shuh u la ong ruh ba watla ka dang kynjoh mynta tang 3 tylli ki snem hynrei da ka jingtrei shitom ki doktor bad baroh ki nongtrei ha kane ka jaka ai jingsumar ïa ki nongpang, khamtam ïa u Dr. W. Sutnga uba la bat kum u Medical Superintendent barim u ba la lah ban pynurlong ïa shibun bah ki jingdonkam ha kane ka jaka sumar. Ym tangkata, u la ong ruh ba da ka jingdon kane ka jaka sumar ka la kham pynsuk shibun ïa ki paidbah ban wan wad ki lad jingïarap khamtam lei lei ha kane ka jaka sumar ki la lah ruh ban puid ïa ki briew da ki juk stad thymmai kaba mynta kata kaba ki khot ka ‘Laparoscopic Surgery’ ban lah ban sei ïa ki maw khyllai, jingpang cyst, appendix bad kiwei de, khlem da donkam shuh ban leit ha kiwei ki jaka sumar kiba khamjngai kum ha Shillong.
Ha kane sngi la donlang naduh u Dr. W. Sutnga, Medical Superintendent barim jong ka Civil Hospital Mawkyrwat kum u symbud kongsan, ka Dr. M. Lyngdoh kaba dei kum ka Medical Superintendent ba mynta, u Dr. A. Lyngdoh ha kaba ki la ai ki kyntien ai mynsiem bad jingkyrkhu kyrdoh ïa ki Doktor bad ïa baroh ki nongtrei hapoh ka Civil Hospital Mawkyrwat.
La pynshit pynshngaiñ ïa kane ka sngi da ka jingrwai na ki nongtrei hapoh kane ka Civil Hospital Mawkyrwat. Ïa ka jingïalang la pynïaid da ka Dr. P. Wankhar bad ka jingkren khublei la ïoh na ka kong S. Thabah, Assistant Nursing Superintendent.