Pynkhreh ka Balang Presbyterian Kbet Nongbri ïa ka jingïaseng Synod, 30 tylli ki Solar Light ai u MLA

Nongpoh, K’Lyngkot 15: U Bah Mayral Born Syiem MLA ka Nongpoh, mynta ka sngi u la hiar sha ka shnong Kbet Nongbri ryngkat ki ophisar na ki tnad sorkar bapher bapher ban pynthikna ba ki kam pynroi kin ïaid beit ha katei ka shnong shuwa ban pdiang ïa ka jingïaseng Synod ka ban sa long ha u bnai Rymphang ha ka Balang Presbyterian Kbet Nongbri ba kynthup naduh ki surok, ka madan jaka pynlong jingïaseng bad kiwei kiwei ki kam pynroi.
Ha katei ka juh ka sngi na ka liang u MLA u la aiti ruh kumba 30 tylli ki Solar Light sha ka Dorbar Shnong naka bynta ban wanrah jingshai ïa ki lynti ki syngkien ha katei ka shnong ban wanrah ka jingshai bad ka jingshngaiñ ïa ki nongwan jingïaseng khamtam ha ka por mynmiet.
Haba kren sha ki lad pathai khubor na ka liang u Bah Mayral Born Syiem u la pynpaw ka jingsngewkmen kaba khraw ban ïohi ba ki kam pynroi kila nang ïaid shaid shaid ha katei ka shnong bad kumba la dep ban kular ban ïa u surok hapoh katei ka shnong bad kiwei kiwei ki jingpynkhreh ki dei ban dep shuwa ka jingpynlong ïa ka jingïaseng khnang ba katei ka jingpynkhreh ban pdiang ïa ka Synod kan long kaba itynnad bad kaba ïaid beit ïaid ryntih.
U la ong ruh ba kum u MLA un nym lah ban thaw pyrthei marwei, hynrei dei da ka jingtrei shitrhem ki nongïalam shnong, ki nongïalam Balang kiba la duriap khlem sangeh ban pynbit pynbiang ba katei ka kam ka la ïaid beit bad khmih lynti ba baroh ki jingpynkhreh naduh ki kam pynroi kiba u MLA u la shimkhia kin sa dep haka por kaba biang.
Namarkata kum u nongmihkhmat paidbah u la ong ba hapdeng kine ki jingpyrshang ban pynbit pynbiang bad pynkhreh ïa katei ka jingïaseng synod kin dang don ruh shibun ki jingduna, hynrei kum ki nongshong shnong kim dei ban thew hynrei ban pdiang ïa kane ka jingïaseng da ka mynsiem kaba kylluid bad khlem da thew ïaki jingduna.