Na la ïing jah rngai u samla Khlaiñkupar Nongsiej naduh ka 13 tarik u Kyllalyngkot

Mawkyrwat, K’ Lyngkot 15: U Samla Khlaiñkupar Nongsiej uba ha ka rta 22 snem uba na ka shnong Rangmaw, South West Khasi Hills District u la jah na la ïing naduh ka 13 tarik u Kyllalyngkot, 2026 ha ka por kumba 11:30 eiei mynstep.
U Bah Drus Lyngdoh, Myntri Shnong Rangmaw ha ryngkat kiba haïing hasem, haba kren ha ki lad pathai khubor ki la la ïathuh ba une u samla u Khlaiñkupar u dei uba don jingduna ha ka bor pyrkhat, ym tang katta u long uba thlun ha ka rukom kren bad don ruh ka jingkyllut ha ki shkor.
Ym tang kata, ki la ïathuh ba u Khlaiñkupar u phong ïa ka jacket jeans stang rong blue, ka patlun rong ïong, ka T shirt jersey football rong meroon, u long uba met lieh bad u don ka rynïeng kaba 5 phut 3 inchi.
Ha kaba ïadei bad kane ka jingjia ki paidbah dong, kiba haïing ha sem, ka shnong ka thaw baroh kawei ryngkat ki pulit ka Mawkyrwat ki la pynlong ïa ka jingwad paidbah ïa u hynrei haduh mynta ym shym la lap dien satia ïa u.
Kumta, ka shnong Rangmaw ka kyrpad ïa ki paidbah ka dong ka thaiñ ba lada ki lap ne ïohi ïa une u samla, kin pyntip lem ha ka shnong bad ki pulit lane ban phone ha kine ki number, 9863398734, 8132017241, 9863807809.