Khliehriat K’ Lyngkot 15: Ka jingpynkhreh ïa ka aïom lehkmen ki heprit ne ka Lympung ki khynnah Seng Khasi Seiñraij kaba Arphew Wei (21) ka la ïaid shait shait ha madan Nohsiang ha ka Shnong Tuber Shohshrieh, East Jaiñtia Hills District.
Kane ka lympung ki khynnah seng Khasi Seiñraij kan long ha ki arsngi lynter kata ha ka 17 tarik bad 18 tarik Kyllalyngkot halor ka phang ‘Ha la rympei ban tei ïa ka lawei’.
U Dolloi ka Elaka Jowai Ma Puramon Kynjing uba dei ruh u President ka lympung ki Khynnah Seng Khasi Seiñraij haba kren sha ki lad pathai khubor ha ka 15 tarik Kyllalyngkot ula ong ba kane kadei ka sien ba ar ba la pynlong ïa ka lympung ki khynnah seng Khasi Seiñraij hapoh ka thaiñ East Jaiñtia Hills District.
U kyrmen lyngba ka jingïatreilang jong ki nongïalam bapher bapher kiba don ha kylleng ka Bri u Hynñiewtrep Hynñiewskum, kane lympung kan long kaba shongkhia shongkun bad kaba phuh phieng.
Ula ong ruh ba ka jingthmu jong kane ka lympung ka long ban pynkmen pynsngewbha ïa ki khynnah bad ruh ban pynshlur ïa ki ban pynpaw pyrthei ïa ka sap ka phong naduh ka sap rwai sap shad kumjuh ki riam ki beit ki jingkup jingdeng tynrai ryngkat ka jingkren jingkhana.
Haba ïadei bad ka lynti synkien u Dolloi ula pyntip ba la pynkhreh kyrpang tang kawei ka surok (One way) kaba baroh ki kali kin rung najan ka Duwan Seiñraij Tuber Shohshrieh.
Namarba ka lympung ka long harud ka surok bah kaba jngai 15 kilomitre na Jowai, kumta u Dolloi ula kyrpad ïa ki nongwan sha ka lympung ban wan shwa ka por khnang ban lait na kano kano ka jingthut ha ka leit ka wan. Ula kyntu ruh ïa baroh ban ym bret pathar ïa ki plastik ne ki song jingbam kiba pynjakhlia ïa ki lynti synkien bad ktah ïa ka mariang.
U Waheh shnong ka Tuber Shohshrieh Ma Lar Bang bad President Seinraij Shnong Tuber Shohshrieh Ram Muruh kila pynpaw ka jingkmen namar ka jinglah ban pynlong ïa ka lympung ki khynnah hapoh ka Shnong Tuber Shohshrieh ki la ïoh shibun ki jingmyntoi na ki tnad treikam sorkar bapher kynthup ka surok, ka bording, ka um nalor kiwei kiwei ki lad jingmyntoi.
Ki khmih lynti ba baroh ki nongwan sha ka lympung kin poi da ka jingsuk jingsaiñ khnang ba kane ka lympung ki khynnah kan long kaba phuh iphieng bad shongkun shongkhia.
