Khur jingjop ka Golflink XI Star bad ka Matrisangha ha ka SCA Cricket League 2nd Division 2026

SHILLONG, Kyllalyngkot 15: Ka Golflink XI Star bad ka Matrisangha ki la jop ïa la ki jong ki jingïalehkai ka lympung Shillong Cricket League 2nd Division 2026 jong ka Shillong Cricket Association, kiba la long hynne ka sngi Palei.
Baroh ar ki la jop da tang khyndiat ron, ha kaba ka Golflink XI Star ka la pynliem da ka said da tang 4 ron ïa ka Sportive CC, katba ka Matrisangha da 3 ron ïa ka Sanmer CC.
Ha ka jingïalehkai ba nyngkong, ka Golflink XI Star ka la buh ïa ka thong kaba 157 ron bad hap 5 wiket haduh kaba kut jong ki 20 ober, nangta ka la pynkut ïa ka pali tied jong ka Sportive na ka bynta 153/8 haki 20 ober ba la mang.
Kiba la kyrshan bor bah ïa ka Golflink XI Star ha ka tied ki long u Ankit Singh Rathore (kamai 63 ron naki 55 bol) bad u Prem Mahato (35 ron naki 20 bol), katba u Pritam Singh (khur 3/30 naki 4 ober), uba la khur ïa ka khusnam Player of the Match bad u Prem Mahato (khur 2/26 naki 4 ober) ki la noh synñiang da kaba lehkai ha ka boling.
Ha ka jingïalehkai kaba bud, ka Matrisangha ka la kam trai ban tied nyngkong hadien ba jop ïa ka jingkynting pisa (toss). Ka spah ron jong u Sajan Maghaiya (114 ron naki 52 bol) ka la ïarap ïa ka kynhun ban buh ïa ka thong kaba 200 ron hadien ba ka la tied pyndep ïa ki 20 ober ba la mang bad khyllem 4 wiket.
Ka Sanmer CC ka la ïakhun tyngeh haba wan beh ïa ka thong, hynrei ki 20 ober ba la mang ki la lap ba kut shuwa, ha kaba ka kynhun ka la ïohlad ban kamai 197 ron bad hap 9 wiket bad duna da tang 3 ron ban poi sha ka thong. Kiba la lamkhmat ha ka tied ki long u John Kharbubnah (44 ron naki 21 bol) bad u Pynshngain Dkhar (35 ron naki 19 bol).
Nalor ka spah ron jong u Sajan Maghaiya uba la khur ïa ka khusnam Player of the Match, ka Matrisangha ka la don ruh katto katne ki nongkawang bol kiba la tyngshaiñ ha ka boling, u Kishor Bhowmick u la khur 5 wiket bad ailad tang 20 ron naki 4 ober, katba u Sajan Maghaiya u la weng 2 wiket naki 4 ober.