La kum ka surok khlaw sniew ka surok na Them Bijoy, ym don kiba shimkhia haduh mynta

Shillong K’ Lyngkot 14: Ka jingsniew palat jong ka surok ha Them Bijoy, Shillong ka la wanrah ka jingeh kaba bun bha ïa ki nongleit nongwan, khamtam ki kali kiba ïaid lyngba kane ka surok manla ka sngi.
Ha ka jingleit jurip ïa kane ka surok la shem ba kane ka surok ka la bun bha tang da ki thliew ki syar ha baroh kawei ka surok bad da ka jingdon kine ki thliew ki syar, ka la wanrah jingeh ïa ki kali namar ki hap ban ñiah kyllaiñ ban kiar na kine ki thliew bad ka jingsniew palat ka surok.
Wat ki ar shaka ruh ki hap ban ïaid khongwaiñ ban kiar na kine ki thliew ki syar.
Lah ban ong ba kane ka surok kadei kaba sniew lah bun bun bnai hynrei namarba ka hab hapoh ka jingpeit jong ki shipai, lyngba ka Shillong Cantonment Board, ka lah ban long lehse ba wat ka tnat PWD Roads ka jylla kam shym lah ban maramot.
Hynrei kiba bun pat ki paidbah kiba ïaid na kane ka surok ki la pynpaw ïa ka jingangnud ïa ka jingdonkam ban maramot noh kloi ïa kane ka surok namar kadei ka lynti short cut kaba ban pynkloi ban mih ne leit sha Civil Hospital Shillong bad kiwei kiwei pat ki shnong.
Lah ruh ban ong ba ka jingdon jong kane ka surok ka la long ka jingmyntoi kaba khraw shibun bha ïa ki nongleit nongwan lah da ki phew phew snem, ba kynthup ruh ïa ki nongshong shnong kiba wan na ki thaiñ nongkyndong kiba wan donkam, kiba wan ïew wan hat bad kiwei pat ki jingdonkam.