Namar ba ka jaka kam long pdeng, dawa ki paidbah ban kynriah ïa ka Sub-Centre na Mynksan sha jaka ba long pdeng

Khliehriat Kylla-lyngkot 12: Ki paidbah nongshong shnong jong ka Kyrwen, Madan Rwan, Ynniawkmai mynta ka sngi ka12 tarik Kylla-Lyngkot 2026 ki la ïa mih paidbah ban pyrshah ïa ka jingpyntrei bab shna ïa ka Sub-Health Centre ha shnong Mynksan, West Jaiñtia Hills bad ki la dawa ban shna ha ka jaka ba long pdeng na ka bynta ka jingbit jingbiang lang jong baroh ki paidbah jong ki San shnong kiba kynthup ka Mynksan, Ionglang, Kyrwen, Madan Rwan bad Ynniewkmai.
Kane ka Sub-Health Centre kaba dang pyntrei mynta ka hap hapoh u pud u sam jong ka shnong Mynksan, hynrei ka sur jong u paidbah nongshongshnong na Madan Rwan, Kyrwen bad Ynniawkmai ka la mih bad ong ba kane ka Sub-Health Centre kam shym la long pdeng satia ïa ki san shnong bad kaba long pdeng ka dei ha ka shnong “SLARUIN”. La ong ba kane ka shnong Slaruin ka don harud ka surok Raliang-Sahsniang bad kaba long pdeng ïa ki san tylli ki shnong naduh Madan Rwan, Kyrwen, Ynniawkmai, Ionglang bad Mynksan.
Ka sur ki spah ngut kiba la pynlong da ka jingiaid Rally, kiba kynthup naduh ki rangbah, ki samla, ki longkmie, ki la ïa mih na la ki shnong sha kane ka jaka kaba la shna ïa kane ka Sub-Health Centre bad ki la ïa lum lang ha phyllaw jong kane ka Sub-Health Centre kaba don hapoh u pud shnong jong ka shnong Mynksan, da kawei ka sur ki Pyrta ” pyn kynriah ïa kane ka Sub Centre nangne bad shna ha Slaruin ka jaka kaba long pdeng ïa ki san shnong na ka bynta ka jingmyntoi ki paidbah nongshongshnong jong ki san shnong bad kiwei kiwei de ki shnong kiba mrjan”.
Ka Rally paidbah kala dawa pynkynriah ïa kane ka Sub-Health Centre kaba la sdang tei ha Mynksan (hapoh u pud shnong jong ka) ka long kaba jai-jai, hynrei wat la katta na ka liang ki bor jong ka Aiñ kiba peit ïa ka shongsuk shongshngaiñ ki la long peitngor bad pahara ba kan ym mih kano kano ka jingkulmar.
U Waheh shnong ka Kyrwen Waheh Wankhana Suchiang, u Waheh shnong ka Madan Rwan Waheh Headlang Lapasam bad kiwei de ki Rangbah haba kren sha ki pathai khubor, ki ong “Ngi kum ki Waheh shnong bad ki paidbah ngi wan hangne ym ban shna jingkulmar, hynrei ngi wan ban pyni pyrthei ba ngi ruh nhi kwah ba kane ka Sub-Health Centre yn pynkynriah nangne bad shna ha Slaruin ka jaka kaba long pdeng ïa baroh ki san shnong kiba wan shim dawai khamtam ki kynthei ki khynnah bad ki longkmie kiba armet bad kaba don harud u surok Sahshniang Raliang ka ban pynsuk ruh ïa ki nongleit nongwan ban wan shim dawai na kane ka Sub-Health Centre.
Ha kane ka sngi na ka liang ki bor District jong ka West Jaiñtia Hills, la wan mihkhmat da u Magistrate ma P. Passah.Ki jingiakren ki long kiba jai-jai bad kiba ïa sngap ïa ka jingia ai jingmut markylliang. Na ki jingiakren la sngewthuh ba ïa kumba long mynta ïa kane ka jingtrei yn pynsangeh shwa ban pyntrei tat hadien ka jingialang kaba yn sa khot kyrpang ka ban sa long shen ha D.C. ophis ha Jowai.
Ha kane ka sngi na ka liang ki paidbah kiba iaid rally ki la ap ïa u Waheh shnong Mynksan ba un wan pynshai ïa ka jingshna ïa kane ka Sub-health Centre bad hadien shikynta da ka jingsynran ki Pulit u la wan mih bad ïa kynduh ïa ki paidbah kiba pyrshah ïa ka jingshna ïa ka Sub-Health Centre kaba don hapoh u pud u sam ka shnong Mynksan bad dawa ban pynkynriah ne shna ha Slaruin ka jaka kaba long pdeng ïa baroh.