Bthah u Myntri ïa ki Ophisar ban ïakynduh ïa ka Pro-VC ka Tura Campus halor ki kynrum kynram ka NEHU

By Mawphor Editor On Jan 13, 2026

Shillong, Kyllalyngkot 12 : U Myntri ka tnad pule puthi ka sorkar jylla u ma Lahkmen Rymbui mynta ka Lah Sngi U Blei u la bthah ïa ki ophisar ka tnad jongu ban ïakynduh ïa ka Pro Vice Chancellor ka North Eastern Hill University (NEHU) Tura Campus ka Prof F Marak, ban ka Prof F Marak,ka Prof F Marak, ïakren sngewthuh bad ka kumno ban pynbeit noh ïa ki kynrum kynram hapoh ka NEHU hadien ba u Vice Chancellor u Prof P Shukla u la sangeh ban wan ophis mynta la 422 sngi.
U Myntri u la bthah ïa ki ophisar ka tnad pule puthi ka sorkar jylla hadien ba la wan ïakynduh ïa u da ki nongïalam ka NEHUTA, NEHUNSA, NEHUSU bad KSU mynta ka sngi bad kyrpad ïa u ba un leh ei ei halor kane ka jingeh ba ki samla pule bad ki Nonghikai ka NEHU ki ïakynduh. Kitei ki seng ki la wan kyrpad ban ïakren la ka Pro VC jongka NEHU Tura Campus ka treh ban wan shimti kum ka Acting Vice Chancellor lane ban hiar noh na ka shuki khnang ban ailad ïa ki Professor kiba la rim ha ka kam ba kin shimti noh ïa kane ka kam khnang ba ki kam ki jam hapoh ka NEHU kin ïaid beit ïaid ryntih kum mynshwa.
“ Nga la bthah ïaki Ophisar jongnga ban pynbeit noh ïa ka jingïakynduh bad ka Pro VC Tura ban sngewthuh kaei ka jingsngew ka jongka khnang ba ka jingthmu jongka sorkar ban ïohi ba ki kam ki jam kin ïaid beit hapoh ka NEHU bad kan ym don kano kano ka jngktah ïa ki samla pule kumba long mynta namar lada thut ha NEHU kan ktah lut ïa baroh kawei ka jylla namar kiba bun bah ki College ki dei kiba pynïasoh bad ka NEHU bad wat ka scholarship jong ki samla pule ruh kam dei ban thut satia” ong u Ma Lahkmen.
“ Kumba long mynta ka jingtreikam ha NEHU ka la ktah bad dkhoh jur shisha, ka buh ha ka jingeh ban pynbna ïaki result, ban siew ïa ki jingsiew bapher bapher naduh ka jingmang pisa ïa ki seminar bad kiwei kiwei ki prokram jongka NEHU” ong biang u ma Lakmen.
U Ma Lahkmen u la phah shithi sha u Myntri ka tnad pule puthi ka sorkar pdeng naduh ka 15 tarik Nohprah 2025 ha kaba u la kyntu ïa u ban shim khia ban pynbeit ïa kine ki jingeh kiba jia ha NEHU.
“ Ngan sa pyrshang ban leit ïakynduh bad u khnang ban ïakren kiei ki lad ki lynti ban leh ban pynbeit ïa kine ki kynrum kynram hapoh ka NEHU khnang ba kiei kiei baroh kin ïaid beit kumba ju long namar kane ka dei kawei na ki skulbah kaba paw ha India kumta ki jingpynïaid kam ki dei ban long kiba beit bad ryntih” ong u Myntri.
U Myntri u la pynpaw ruh ïa ka jingdonkam kloi ban pynbeit ïa kane ka kynrum kynram “ Ngim lah ban shu ïai ap sah na kawei ka sngi sha kawei ka sngi ba ka jingtreikam kan thut “ ong u Ma Lahkmen da kaba ong ruh ba u la bthah bha ïa ki Ophisar jongu ban ïakren sani bad ka Pro VC ban ïa pynbeit noh ïa kane ka kam.
Ki kyndon jongka NEHU kim don ba yn lah ban thung ïa u Acting VC bad une uba mynta u dei ban hiar shuki khnang ba kiwei kin ïoh ban shimti ïa ka kam. Kane ka jingpynslem kam ktah tang ïa ka NEHU hynrei wat ïa ki college kiba pynïasoh bad ka NEHU ruh. U la ïathuh wat u Myntri Rangbah ka jylla u Conrad K Sangma ruh u ïai bud dien ïa kane ka kam bad ka sorkar pdeng khnang ban pynbeit kloi ïa kine ki kynrum kynram kiba la bteng la bun bun por ha NEHU.