Pynlong ka ophis DLSA West Jaiñtia Hills ïa ka prokram ai jingpynshai ban ïada ïa ka mariang

Khliehriat, K’Lyngkot 10 : Kum shibynta ka jingrakhe ïa ka National Legal Service Authority (NALSA) pan India Environmental Legal Literacy & Community Protection, ka District Legal Services Authority, West Jaiñtia Hills ha ryngkat ka jingiatreilang bad ka tnat khlaw hynnin ka sngi ka la pynlong ïa ka prokram ai jingpynshai kaba ïadei bad ka mariang lane ka ka Environmental Legal Literacy bad ka phang pdeng jong kane ka prokram ka dei “ ïada mynta bad sngewshngaiñ ïa ka lashai (Protect Today, Secure Tomorrow”).
Ha kane ka prokram la pynlong ha Jowai Police Station bad ha Ïawmusiang, Jowai, West Jaiñtia Hills District bad ka jingthmu jong kane ka prokram ka long ban pynjur ïa ki prokram ai jingpynshai paidbah ha kaba ïadei bad ki aiñ ki kyndon kiba iatyngkhuh ka mariang bad ruh ban pynshai sha ki shnong ki thaw halor kumno ban ïada ïa ka mariang sawdong.
Shuh shuh, ka jingthmu jong kane ka prokram National Legal Service Authority (NALSA) pan India Environmental Legal Literacy & Community Protection, ban pynshai paidbah ruh ïa ki aiñ sha ki paidbah nongshong shnong halor kino kino ki mat kiba ïadei bad ka mariang, ban kyntiew bad ban pynshlur ïa ki paidbah ba kin pynmlien ialade ban ïada ïa ka mariang bad ruh ban pynkupbor ïa ki shnong ki thaw ha kaba ïadei bad kino kino ki kam ïada mariang.
Kiba la ai jingkren ha kane ka prokram ki kynthup ka muktiar lane Government Pleader, jong ka Forest Department, West Jaiñtia Hills, ka kong M. Suchiang, ka Assistant Aid Defense Counsel, ka kong S. M. Saioo bad ka Chief Legal Aid Defense Counsel , ka kong D. Sutong, baroh kiba la ai jingkren ki la kren halor ka jingdonkam ban shimkhia ban ïada ïa ka mariang kum shibynta ban leh katkum ka aiñ bad ruh shibynta kum ka jingdon ka jingkitkhlieh ban ïada ïa ka mariang. Ki ba la kren ha ka prokram ki la batai ruh ïa ka jingïadei kaba jan bha hapdeng u briew bad ka mariang.
Ha kane ka prokram, kiba kren ki la ban jur bha ruh halor ka jingdonkam ban pynneh pynsah ïa ka khuid ka suba ha ki sawdong, sawkun, ban thung ïa ki dieng namar ki dieng ki siej ki don ka bynta kaba donkam bha ym tang na ka bynta ka jingim briew hynrei ki donkam bha ruh ha kaba pynneh pynsah ïa ka mariang, ki la kyntu ïa ki paidbah ba kin sngewthuh ïa ka jingim kaba ïajan bad ka mariang lane ka eco friendly, ban shim ïa ki synjan ba donkam ha kaba ïada ïa ka mariang na ka bynta ka jingbit jingbiang jong kane ka pateng bad kumjuh ruh ka patang ka ban wan.
U heh sorkar jong ka tnat khlaw, u Range Officer, Social Forestry, Jowai Division, u la kren halor ka jingjot ka mariang bad ka jingap jingma, khamtam ka jingjur ka jingpynmih ïa ka lyer jakhlia bad kaba ap jingma ba ïoh kane ka jia kumba jia ha nongbah New Delhi, u kyntu jur ïa ki paidbah jong kane ka pateng ba mynta ba ki dei ban don lem ka jingkitkhlieh ban ïada ïa ka mariang khnang ba ka pateng ka ban wan ka ïoh ïa kynti pateng ïa ka mariang kaba khuid, ka mariang kaba bha bad kaba koit ba khiah, u pynkynmaw ruh ba ka lyer ba khuid, ka um ba khuid bad ka khyndew ki dei ki bynta kiba donkam tam ha ka jingim briew, u kyntu ïa ki paidbah ban pynmlien ban thung ïa ki dieng bad ruh ban wan ban ïashimbynta lang ha kino kino ki prokram ba ïadei bad ka mariang, u la ong ruh ba watla ki briew ki pom ïa ki dieng ki siej na ka bynta ka jingdonkam jong ki hynrei dei ban thung bujli pat da kiwei ki dieng namar ka jingdon bun ki dieng ki siej kan wanrah ïa ka mariang kaba bha bad ka mariang kaba kup rong jyrngam.