Ha ka jingphuh jingphieng la pynkut noh ïa ka ‘1st Marshilong Winter Festival 2026’ ha shnong Marshilong

Mawkyrwat, K’lyngkot 08 : Ha ka jingphuh jingphieng, ka Dorbar Shnong Marshilong mynta ka sngi ka 8 tarik u Kyllalyngkot, 2026 ka la ïoh ban pynkut noh ïa ka lympung jong ka jinglehkmen ba la tip kum ka ‘1st Marshilong Winter Festival 2026’ ba la pynlong ha Madan Mawhiang, Marshilong, South West Khasi Hills District ha kaba u bah Renikton Lyngdoh uba dei u MLA ka Mawkyrwat Constituency u la long kum u kongsan.
U bah Renikton Lyngdoh uba dei u MLA ka Mawkyrwat Constituency kum u kongsan haba kren ha ka jingïalang u la pynkynmaw ba lyngba kane ka lympung kan dei kawei na ki lad ban don ka jingïakynduhlang kum shipara shnong bad ban ïa ithuh iwei ïa iwei pat lyngba ka jingïashimbynta ha ki jait jingïalehkai bapher bapher. Haba kren pat na ka bynta ki longkmie, u bah Renik ula ong ba da ka jingbuh jong ki ïa ki dukan ne ki stall, kan sa long ka jingïarap ha ka ban kyntiew ïa ka ïoh ka kot jong ki hapoh ki Self Help Groups (SHGs) lyngba ki lad kamai.
Namarkata, ula ai ka jingkitbok kitwriang na ka bynta ka shnong baroh kawei ba lyngba kane ka lympung jinglehkmen kan pynkhie im biang ïa ki jinglehkai tynrai bad ba ki khun samla bad ki hep kiba rit kin dang ïa bteng ban ïalehkai na uwei u snem sha uwei pat. U la kyrkhu kyrdoh ruh ïa ka shnong baroh kawei ba kan nangroi kyrhai ha ki liang baroh lyngba ka jingïalong kawei bad ïalong shitylli.
Haba kren pat ha kaba ïa dei bad ki kam pynroi, u la ong ba ha kane ka shnong Marshilong u la leh ïa shibun ki kam, hynrei katkum ka jingkwah jong ka shnong pat ki dang bun bah. Namarkata, u la ong ba kum u Nongmihkhmat ïa ka bynta ba u dei ban leh ne ai bhah ha kaba ïa dei bad ki kam pynroi hapoh shnong kumba ki la pan, u la kular ba un sa bhah ha ka mang pisa jong mynta u snem lyngba ka MLA Scheme.
Lah ban kdew, ba ka jingthmu jong kane ka jinglehkmen ka long ban pynkhie im biang ïa ki jingïalehkai tynrai, ki jingriam tynrai, ki rwai pharaw tynrai bad kiwei de kiba la pynsngewtynnad ïa ki paidbah nongshong shnong, bad kawei de ki jingthmu ki long ban wanrah ka jingïatylli jingïalong kawei hapoh ka shnong ka thaw bad ban pynkhih jingmut ïa ki khun samla ba kin mih shakhmat ha ki jingïalehkai khnang ba kin lait na ki jingsniew kiba bun jait.
Haba kut jong ki jait jingïalehkai, la ïoh ban sam ïa ki khusnam sha baroh ki nongjop kiba la ïoh ban ïa shimbynta kata ha ka jingïakop-siat khnam ba para marwei ki long u bah Prospersik Wanniang, ba ar u Bilerian Thongni, bad ba lai u Stancius Wanniang katba ha ka jingïakop-siat kynhun pat la jop da ka kynhun jong u Bilerian Thongni. Ha ka jingïalehkai kynjatbol la jop da ka Banangroi Football Club da 1 – 0 kol pyrshah ïa ka Maitlongtei Football Club.
Ki nongjop ha ka rwai phawar ki long ba nyngkong dei u bah Anthony Lyngkhoi, ba ar dei u bah Pynshongdor Kharjahrin bad ba lai dei u bah Donbok Ramsiej. Ha ka Mawpoiñ ki nongjop ki long ka Dong Mawhiang ba nyngkong, ba ar ka Dom-Thungkhlieh bad ba lai ka Breimahriang. Nangta, ha ka jingïakop-pyni riam tynrai (Fancy Dress) ba la jop da u Herbertdonsil Lyngdoh, u Francisco Lyngdoh, bad ka Maphibantei Lyngdoh.
Kiba la donlang ha kane ka long naduh u bah G. Thongni uba dei u Myntri Shnong Marshilong uba la pynïaid ïa ka jingïalang lem bad ki ‘riew rangbah, ki longkpa ki longkmie, ki khun samla bad ki hep kiba rit jong ka shnong Marshilong.