Ha ka Dorbar Kur, pynkup burom ka seng kur Maring ïa ki riew donsap bad ki khun samla ba pass bha
Nalor ka jingpyninam ïa ki riti ki dustur
Nongpoh, K’Lyngkot 07: Ka Seng Kur Maring mynta ka sngi ka la pynlong ïa ka Dorbar Pyllun kaba 14 jong ka seng Kur Maring kaba ju pynlong shisien shisnem ha ka shnong Mawjong jong ka Raid Nonglyngdoh ha Ri-Bhoi District hapdeng ka jingiphuh iphieng namar ha kane ka sngi la ïoh ruh ban pynsngew pynsngap ïa ka khanatang jong ka jingïaid lynti ka kur Maring nalor ka jingpyni nam ïa ka kolshor bad ki riti ki dustur.
Ha kane ka sngi na ka liang ka kur Maring na kylleng ka ri Khasi kila poi sha kane ka jingïalang bad kum ka kur kala ïoh ruh ban pynkup burom ïa ki nongkitkam, ki riew donsap bad donnam ka kur maring kiba la noh synñiang shibun sha ka imlang ka sahlang bad kumjuh ruh kiba la don bynta ban pynneh pynsah ïa ka riti ka dustur.
Nalor katei ka jingpynkup burom ïa kitei ki riew donsap bad ki nongkitkam ka kur, la ïoh ruh ban pynkup burom ïa ki khun samla kiba la wan shakhmat ha ka pule ka puthi kaba long ruh kum ka jingai mynsiem bad ka nuksa ïa kiba bun ki khun samla kiba dang heh dang ban ba ka dang dei ka por ïa ki ban minot namar ka jingnang ka jingstad ka dei ka atiar ha kine ki sngi ba mynta.
Ïa kane ka Dorbar Pyllun ka sengkur Maring la lamkhmat da u Babu Stephanson Maring kum u President Rangbah ka kur, u Bah Robert Maring General Secretary ka Sengkur Maring, u Bah Spal Maring Assistance Secretary lem bad kiwei kiwei ki nongkitkam ka kur.
Ha kane ka sngi la ïoh ruh ban pynskhem ïa ki nong kitkam ka Sengkur Maring Unit Mawjong ba kynthup ïa u tbn Rani Maring kum u Adviser, Justin Maring kum u President, T Maring kum u General Secretary lem bad kiwei kiwei de ki nongkitkam bad ki dkhot ka sengkur Maring Unit Mawjong.
Ha kane ka sngi la wan ban pynshit pynshngaiñ ruh daka kong Pinki Maring kaba dei Mrs World Peace 2024 kum ka kongsan, ryngkat ki jingput jingtem bad ki jing shad tynrai ki ba kynthup ïa ka shad Sajer jong ka Raid Nonglyngdoh ban pynpaw pyrthei ïa la ka kolshor tynrai bad ban pynneh pynsah ïa ka riti ka dustur.