11th All India Chief Minister’s Gold Cup International FT: Sdang ka Nongkseh ïa u snem 2026 da ka jingjop pyrshah ïa ka Gangtok Himalayan
Jorethang-Sikkim, Kyllalyngkot 07: Ka kynhun ïalehkai phutbol jong ka Nongkseh Sports Social & Cultural Club (SS&CC) ka la sdang ïa ka kalendar ïalehkai jong u snem 2026 da ka jingjop hadien ba ka la lah ba kan pynliem noh da 2–1 kol ïa ka Gangtok Himalayan Sports Club.
Kane ka jingjop ka la wan ha ka lympung ïalehkai kaba la tip da ka 11th All India Chief Minister’s Gold Cup International Football Tournament kaba la long ha Jorethang hynne ka sngi Balang.
Haba ïalehkai ïa ka jingïalehkai kaba nyngkong eh jong ki shabar na la ïing, ka Nongkseh kaba bat ïa ka nam lahduh jong ka SSA Champions Cup 2025, ka la wanrah ïa ka jingïalehkai kaba skhem bad kaba ryntih ban pynneh ïa ka rekod ïakhun kaba khlem shah rem jong ki ha baroh ki jingïalehkai naduh u snem 2025.
Haba bishar ïa ka jingïalehkai, ka Nongkseh ka la ïoh ban tehlakam bun shah ïa ka kylla step bad ka la ïoh ban lamkhmat ha ka minit kaba 10 lyngba u Shano Tariang, uba la pyndep ïa ka kamram ban pynkhihjar hadien ba ïohpdiang ïa ka bol pashat kaba thikna na u Khrawkupar Jana.
Ka Nongkseh ka la nang pynjlan ar shah ïa ka kol lamkhmat tang shuwa ban jam sha ka por shongthait, ha kaba u Kynsaibor Lhuid u la sei madan ïa ka sap ba kyrpang ban rah pynstet marwei ïa ka bol na liang kadiang shuwa ban thep pat ïa ka sha kol ha ki minit pynjlan jong ka kylla step.
Ha ka kylla miet ruh la ïohi ïa ka Nongkseh kaba la bteng ban tehlakam ïa ka jingïalehkai hynrei kam shym la lah satia ban pynurlong ïa ki kabu ba ka la ïoh. Ka Gangtok Himalayan Sports Club ka la ïohlad ban pynphai shi kol, hynrei ka Nongkseh kam shym la sangeh satia ban ïalehkai ïa ka jingïalehkai kaba pyrkhing ban pynthikna ïa ka jingjop ha kaba khatduh.
Ka Nongkseh SS&CC kan aireng pyrshah ïa ka Eastern Railway (Kolkata) ha ka Pre-Quarterfinal ha ka sngi U Blei, 11 tarik Kyllalyngkot.
Ha kane ka lympung ïa ka Nongkseh SS&CC la ïalam da u Hardy Cliff Nongbri kum u kapten hapoh ka jingpynïaid u Bah Rogestar Basiawmoit kum u head coach. U President jong ka Club u Bah Daniel M. Thangkiew u la synran lang ïa ka kynhun kum u Manager ha kane ka lympung.