SHILLONG, Kyllalyngkot 07: Ka Meghalaya Athletics Association (MAA) lyngba ka kyrwoh ka la pynbna ba kan pynlong ïa ka prokram pyrshang jied ïa ki nongïalehkai lane ka Selection Trial na ka bynta ka sienjam ba nyngkong (1st Edition) jong ka Khelo India Tribal Games 2026.
Da ka jingkyrshan jong ka tnad Sports ka Sorkar jylla Meghalaya ka Meghalaya Athletics Association (MAA) kan pynlong ïa kane ka Selection Trial ha ka 12 tarik u Kyllalyngkot 2026 ha madan SAI STC, Shillong. Ka por kan long naduh 8 baje mynstep.
Na ka bynta kane ka Selection Trial uwei u nongïalehkai (Athlete) u lah ban ïashim bynta tang ha ki 2 tylli ki jait jingïalehkai (event). Ha kaba ïadei bad kane ka synjuk ka khmih lynti ïa ka jingïashim bynta kaba bun na ki nongïalehkai.
Kane ka Selection Trial kan long na ka bynta baroh ki khynnah shynrang bad kynthei; bad ki jait jingïalehkai ki long kumne harum: Ha ka Track Event ki jingpyrshang ki long ha ka ïakop mareh ba 100 mitar; 200m; 400m; 800m; 1500m; 5000m; 10000m.
Ha ka Field Event ki jingpyrshang ki long ha ka Long Jump; High Jump; Discus throw; Shot Put bad ka Javelin Throw.
Kane ka long katkum ka kyrwoh na ka kong Daisy Marwein-Sr. Joint Secretary jong ka MAA.
