SHILLONG, Kyllalyngkot 07: Ki thei ïalehkai ka PFR Football Accademy ki la pynjlan ïa ka jingjop kaba shyrkhei ha ka lympung Women’s Football league 2026 ba la pynïaid da ka Shillong Sports Association (SSA), da kaba pynjemkhnap ïa ka Lawsohtun SC haduh 12-1 kol hynne ka sngi Balang ha madan First Ground-SSA Stadium, Polo.
Da kane ka jingjop ka PFR FA ka la nang pynskhem ïalade ha ka kyrdan ba nyngkong ha ka Group B kaba don san tylli ki kynhun, da kaba jop ïa baroh ar tylli ki jingïalehkai haduh mynta.
Ka Ridalin Suting (5, 22, 34 & 67’) ka la thep marwei haduh saw kol ban ai ïa ka jingjop kaba thikna na ka bynta ka PFR FA, katba ka Nisilia Majaw (3, 10 & 42) ka la thep hat trik. Kiwei pat ki kol la thep da ka Aitihun Majaw (32 & 53’), ka Makrisha Songthiang (36’), ka Phibanda M Nongrum (58’) bad ka BariKor Kurbah (64’).
ïa ka shi kol jong ka Lawsohtun SC la thep da ka Wanda Snaitang (60’).
Kin don lai tylli ki jingïalehkai SSA Women’s Football league 2026 ha kane ka sngi Palei (08.01.2026), ha ka por 10:30 baje mynstep ka Nongrim hills SC pyrshah ïa ka New Challenger SC (Group-C); nangta ha ka por 12:30 baje mynsngi ka Mawkasiang SC pyrshah ïa ka Lawei SC (Group-B); bad khatduh ha ka por 2:30 baje nohphai sngi ka Mawshubuit SC pyrshah ïa ka Laitkor SC (Group-A).
