Jowai, Nohprah 23: U myntri ka sorkar jylla ba dei peit ïa ka tnad Sports and Youth Affairs bad ka tnad ka koit ka khiah u ma Wailadmiki Shylla, ula ong hapoh kane ka shisnem ban wan ‘yn pynkylla dur nadong shadong ïaka madan Kiang Nangbah Stadium Jowai. Ïa kane ula kren haka jingïalang pynkup burom ïa u kaba la pynlong mynta ka sngi 23 tarik da ka WJDSA ha katei ka madan.
Utei u Myntri ula pyntip ka jingshna sawdong ïa ki Gallery kala dei ban sdang noh, hynrei na ka daw ba dang sah ka jingïakhun ban pyndep ïa ka Super Division ka WJDSA kumta la hap ban sangeh shwa.
Shuh shuh ula pyntikna ba ka sorkar kala dep sanction pisa 6.3 klur na ka bynta ban shna ïa kitei ki Gallery kiba don sawdong jong madan, la kumno kumno ka jingpyndep ban shna ïa ki Gallery ka dei ban long hapoh 3 ne 4 bnai khnang ba ka Association kan ïoh sdang ïa ki aiom ïalehkai haka snem ban wan.
Na ka bynta kiwei de ki jingdonkam jong kane ka madan ula pyntip ba ka tnad Sport ka sorkar jylla kala dep ban leh survey ïa ka madan na ka bynta ban shan pynthymmai ïa ka katkum ka juk ba mynta, da kaba shna lang ïa u Synthetic Athletic Track, ban siang pynthymmai ïa u phlang plastic (Artificial Turf), nalor ki VIP Gallery, ki kamra (dressing Room) jong ki nongïalehkai bad ïa ki jingdonkam la dep ban pynkhreh ïa ka DPR.
Na ka liang u myntri ula kyntu ïa ka WJDSA ba ka long kaba khlaiñ haka rukom treikam ban pynkiew shuh shuh ïa ka kam ïalehkai Sports hapoh ka District, da kaba u khot ïa ki nongshong shnong baroh haba don kino kino ki jingïakhuh jong ki Club la jong ki dei ban wan shitrhem ban ai jingkyrshan kum ka dak ban ai mynsiem ïa ki rangïalehkai ha madan.
