Ujor ka Association da ka ejehar ïa ki bar jylla ba kynnoh pynïaid be-aiñ ïa ka ïew Muit ha Ri Bhoi

Nongpoh, Nohprah 20: Na ka daw ka jingkynnoh ba la pynïaid beaiñ ïa ka ïew Muit ha ka thaiñ Byrnihat bad ka jingbym lah ban ai kam ai jam ïa ki khun samla trai District, ki nongïalam ka Ri Bhoi Commercial Pick-up Owners and Drivers Association (RBCPO&DA) ha ka 19 tarik u Nohprah 2025 ki la leit syndon ban ujor da ka ejehar pyrshah ïa ki bar jylla kiba don kti ban pynïaid ïa katei ka iew khlem da don ki kot ki sla.
Haba leit ujor da ka ejehar pyrshah ïa ki bar jylla kiba pynïaid ïa katei ka iew, la ïalam da u President u u Bah Stanwell Manih bad u Finance Secretary u Bah Sam Kharnaior bad ruh da ka jingdon lang kiwei ki nongïalam bad ki dkhot kane ka Association.
Haba kren sha ki nongthoh khubor halor kane ka jingujor ejehar, u Bah Standwell Manih President ka Association bad u Bah Sam Kharnaior kum u Finance Secretary, ki la pynpaw ba ka daw kaba la pynlong ïa ki ban ujor da ka ejehar pyrshah ïa ki bar jylla ha Byrnihat Police Outpost, ka dei ka jingpyrshah kaba jur ïa ki bar jylla bad kito kiba don kti ha katei ka kam ba kim khein snep ïa ki samla ban ai kam ai jam bad ki la kynnoh ba ka don jingyntoi aiu ban don katei ka iew katba ki samla pat ki hap ban shong khlem kam khlem jam.
Ki la ong ruh kum ki nongïalam na ka por sha ka por ki la ju leit ban kynduh ïa ki briew kiba don kti ban pynïaid ïa katei ka ïew na ka bynta ban ai kam ai jam lem ïa ki samla trai District bad kane ka jingkynduh ka la long tang hapoh ka jingïakren khlem da poi shaei shaei ruh bad dei namar kane ka daw kum ka Association ka la shim ïa ka rai ban ujor syndon da ka ejehar da kaba kynnoh ba kam don jingmyntoi ban don katei ka iew ban myntoi ki bar jylla katba ki khun samla ba ym don kam don jam ki hap ban shong kli kti khlem ioh kam ioh jam.
Shuh shuh, ki la bynrap da kaba ong kiba don kti ha kane ka ïew ki dei tang ki bar jylla bad katto katne ki briew High Level, ha kaba ki la shu kular tang ka ktien ban ai kam ai jam bad ka jingleh mynthi ban ai kam ai jam ka la pynlong ïa ka Association ban ujor ejehar bad ha kajuh ka por ruh ïa mynta shipor dei ban khang shwa ïa katei ka ïew katba ym pat lah ban ïa kren sngewthuh na ka bynta ka jingioh kam ioh jam lem ki khun samla ka District, ki la bynrap.