ETIHAD Stadium, Nohprah 20: U Pep Guardiola u la ong ba ka Manchester City “ka dei ban long kaba la pynkhreh” ban wad ïa u nongbujli ynda u la mih noh na kane ka klob – hynrei u la ban jur ba u dang jngai ban pyndep ïa ka kam jong u ha katei ka klob.
La sngewthuh ba ka City ka la sdang ïa ka jingwad ïa ki kyrtong ban bujli ïa une u coach ba tbit na Spain hapdeng ka jingbym thikna la un dang sah ne em ha ka klob ha ka samoi ban wan.
Ha kajuh ka por, u manager ka Chelsea, u Enzo Maresca, uba la long mynshwa u assistant coach jong u Guardiola ha Man City, u la ong ba ki khubor kiba batai ïa u kum u nongmihkhmat na ka bynta u ne u manager na Spain ki dei 100% tang ki jingkynnoh.
Ha u Naiwieng 2024, u Guardiola u la soi ïa ka kontrak ba thymmai kaba neh haduh kaba kut jong u snem 2026-27.
Haba kren ha ka sngi Thohdieng, u la ong: “Nga sngewkmen hangne, nga kwah ban sah hangne. Aiu pat nga lah ban ong? Baroh shi katta ki resol ki rai.”
“Ynda la dei ka [jingkut jong ka] lynnong ka klob kan jied ïa uba biang tam ban bteng ïa kane ka por kaba phylla ha Man City.
“Ki la don ki khubor ha kine ki snem ba la leit noh bunsien, bunsien hynrei nga kwah ban sah hangne. Ha kaba kut jong ka aïom, ngin sa peit.”
Ka City ka la mad ïa ka samoi kaba sniew ha u snem 2024-25, ha kaba kam shym la lah ban jop wat tang kawei ruh ka khusnam lahduh hapoh ka ri ha ka sien kaba nyngkong naduh ka samoi lehkai 2016-17.
Hynrei kane ka samoi ka kynhun u Guardiola ka paw ba ka la lah ban weng ïa katto katne ki jingeh ban ïakhun ha baroh ki liang hadien ka jingpynbha biang ïa ka (kynhun) ha ka por lyiur.
“Nga sngewkmen namar ka don ka bynta ban pynbha, ban leh kham bha. Kata ka long kaba nga sngewtynnad,” u la ong.
“Ka samoi ba la dep ka dei ka samoi kaba eh shisha bad ngam shym la randien bad nga la don hangta. Kane ka aïom ka kham bha shibun ha kaba ïadei bad kiba bun kiei kiei kiba nga dang ïohi bad haduh mynta nga dang don hangne.
“Ka shong ha ka jingsngew jong nga bad ka jingsngew jong nga mynta ka long kaba bha. Dei na kata ka daw ba nga kwah ban bteng.
“Kan sa kylla? Lehse, ngam tip. Hynrei kaei kaba nga sngew mynta kam dei [kata]. Kaei kaba nga sngew mynta ka long bad ki nongïalehkai nga kwah ban bteng katba lah, bad katba lah.”
Khlem da kheiñ ïa ka Community Shield, u Guardiola u la ïalam ïa ka City sha ki 15 tylli ki nam ba khraw naduh ba u la rung sha kane ka klob ha u snem 2016 hadien ba mynshwa u la ïoh mad ïa ki trophy ha Barcelona bad Bayern Munich.
